سی ٹی ڈی ءِ دزگیریں مردمانی منگی تامر بند
ٹی بی پی شونگال
بیست ءُ دو مارچ ءَ بلوچستان سول سیکٹریٹ ءَ سر وزیر بلوچستان ءِ جارکش بابر یوسفزئی ءُ سی ٹی ڈی ءِ ڈی آئی جی اعتزاز گورائیہ ءَ ماھل بلوچ ءِ دزگیر کنگ ءُ بھتامانی درگت ءَ رسانک تران کُت ءُ ایشی ءِ تہ ءَ دزگیریں ماھل بلوچ ءِ مَنَگی تامر بند شنگ کُتگ، کہ اِیشی ءِ تہ ءَ ماھل بلوچ ءَ گوں بی ایل ایف ءَ سیادی دارگ ءِ گپ من اِتگ۔ وھدیکہ دومی نیمگ ءَ ماھل بلوچ ءِ کھول ءِ گشگ اِنت کہ اے منگی تامر بند زورانسری جوڑ کنائنگ بیتگ۔
ماھل بلوچ ءِ سی ٹی ڈی ءِ دزگیری ءَ اولی تامر بند نہ اِنت، دو ھزار ءُ پانزدہ ءَ پاکستانی واکداراں ٹاہ داتگ اَت کہ بلوچ سلاہ بندیں گلے ءِ دو باسک شفقت رودینی ءُ ابراھیم نیچاری بیڑیے ءِ نیام ءَ دزگیر کنگ بیتگ اَنت ءُ پد ءَ ھما دویں مردماں دزگیری ءِ نیام ءَ تامر بند ءِ جوڑ کنائنگ بیتگ اَت ءُ ھما وھدے بلوچستان ءِ تھ ئِے کارانی وزیر سرفراز بگٹی ءِ ھستی ءَ شال پریس کلب ءَ رسانکدر ءِ دیما شنگ کنگ بیتگ اَت بلے رسانکدر ءِ دیم ءَ مَنَگ نامہ ءَ پد ھم شفقت رودینی ءُ ابراھیم نیچاری مستونگ ءِ ھند کانک، کلی کنڈاوا ءَ یک دروگیں میڑ ئے تہ ءَ پولیس ءَ گوں دیم پہ دیمی جنگ ءَ جنگ بیت اَنت۔
جنوری دو ھزار ءُ بیست ءُ یک ءَ رودراتکی بائی پاس ءَ چہ ایگل فورس ءَ سمیع اللہ پرکانی ءُ جمیل احمد پرکانی ءِ دزگیری پدر کُت ءُ آمید گِس ءَ دیم ءَ آرگ ءَ پد ھم دروگیں پولیس میڑ ءِ تہ ءَ کُشگ بیت اَنت۔ چہ ھاران ءَ سی ٹی ڈی ءَ شفقت یلانزئی ءِ دزگیر کنگ ءَ پد دزگیری ءِ نیام ءَ آئی ءِ منگی تامر شنگ کُتگ اَت وھدیکہ چہ ھزدار ءَ عبدالمنان ءُ سرفراز احمد ءِ زورانسری بیگواہ کنگ ءَ پد آیانی تامر بند شنگ بیتگ اَنت۔
کانودی زانتکارانی رد ءَ پولیس ءِ دزگیری ءَ بندیگیں مردمانی تامرانی تہ ءَ مَنَگ نامہ ءِ ھچ کانودی ارزشت نیست اِنت ءُ پاکستانی آمید گساں باز بر ءَ پولیس ءِ نیمگ ءَ دزگیری ءِ وھد ءَ گپتگیں زورانسریں درشان رد کُتگ اَنت، پمیشکا چُشیں تامر بند تھنا پندل زانگ بنت۔
ایمنسٹی انٹرنیشنل، ھیومن رائٹس کمیشن آف پاکستان ءُ سیاسی گل ماھل بلوچ ءِ دراج کُشیں دزگیری ءِ پد ءَ تُرس ءِ درشان کَنگ ءَ اَنت ءُ پاکستان ءِ انیگیں نگیگیں جاورانی تہ ءَ ڈیھی ادارگانی نیمگ ءَ چہ چُشیں وئیلانی درچ ءَ یکشلی ءَ گوں برجاہ دارگ ءَ بلوچستان ءِ ھاتر ءَ ترسناک نامینگ ءَ اَنت۔
سر وزیر بلوچستان ءَ آجوئی ءِ جد ءُ جھد ءَ گوں بندوکیں گلاں ترانکاری ءِ داوت دئیگ ءَ اَنت وھدیکہ بلوچستان سرکار ءِ مستری ءَ چُشیں وئیل آیانی گیر سنگینی ءَ پدر کنگ کہ اِیش جنگ زدگیں بلوچستان ءِ جاورانی گنتر ھراب کنگ ءِ سوب جوڑ بنت اِنت۔