بلوچستان : جتاجتائیں وئیلانی آسر ءَ دوازدہ مردم بیران ءُ سیزدہ ٹپی بیتگ اَنت

بلوچستان ءِ جتاجتائیں وئیل، نوشکی ، سبی ، پشین، ھرنائی ءُ ھب ءَ دیم ءَ اَتکگ اَنت-

سربوتگیں ھالانی رِد ءَ چہ ھرنائی ءَ سیادی داروکیں مرد ءِ گاڑی بوستان خانان ھند ءَ پولٹری مزدا ٹرک ءِ گوم ءَ یک تُرسناکیں وئیلے دیم ءَ اَتکگ-

وئیل ءِ سبب ءَ گاڑی ءَ سوار چار مردم بیران بیتگ اَنت وھدے کہ دو مردم سک ٹپی بیتگ اَنت- ٹپی شال ءَ برگ بیتگ اَنت-

پشین ءَ بیتگیں دگ وئیل ءَ چہ چار مردم بیران ءُ سے ٹپی بیتگ اَنت-

پولیس رِد ءَ پشمبے ءَ پشین ءِ دمگ کلی خانان بوستان بی کے نزیک ءَ شال ژوب دگ سر ءَ مزدہ ٹرک ءُ گاڑی ءِ میان ءَ ڈک ورگ ءِ آسر ءَ سراج الدین ، مراد خان، ثاقب علی ءُ جمال الدین بیران بیتگ اَنت وھدے کہ خدائیداد ، عین اللہ ءُ محمد ظریف نامیں مردمے ٹپی بیتگ-

پولیس لاش ءُ ٹپی زوت الاج ھاتر ءَ نادُراھجاہ ءَ برتگ اَنت-

ھمے وڑ نوشکی ءَ شیر جان آغا ءِ ھند ءَ سرف گاڑی ءُ کوچ میان ءَ ڈک ورگ ءِ آسر ءَ دو مردم بیران وھدے کہ دو ٹپی بیتگ اَنت- لاش ءُ ٹپی زوت نزیکیں نادُراھجاہ ءَ برگ بیتگ اَنت-

دومی نیمگ ءَ ھرنائی ءِ دمگ غریب ِآباد ءَ یکشلہ ھور ءِ سبب ءَ کمرہ ءِ چت کپتگ ءُ چریشی ءِ آسر ءَ یک زالبولے بیران بیتگ –

سبی ءَ انچش ھال سر بیتگ کہ بکھڑا غلام بولک میتگ ءَ ٹکی میان ءَ جنگ ءُ چوپ ءَ شش مردم ءِ ٹپی بیگ ءِ ھال اِنت-

دگہ یک وئیلے گڈانی ءَ دیم ءَ اَتکگ کہ پولیس کارندھے ءَ وت ءَ تیرجتگ ءُ وتکشی کتگ-

بلوچستان ءِ تیاب دپی دمگ گڈانی ءَ پولیس کارندھے نازانگی سبب ءَ وت تیرجتگ ءُ وتکشی کتگ ءُ آئی ءِ پجّار عزیز ڈگارزئی نام ءَ چہ بیتگ- پولیس گوشگ رِد ءَ عزیز ءَ سرکاری تُپنگ زرتگ ءُ تھانہ ءِ تہ ءَ وت تیرجتگ ءُ وتکشی کتگ-

پولیس ءَ لاش وتی دستیگ کتگ ءُ نادُراھجاہ ءَ برتگ کہ اود ءَ گیشیں چار ءُ ٹپاس ءَ پد لاش کھول ءِ دست ءَ-

اِھوالکارانی رِد ءَ اے کارندہ پانزدہ سال ءَ چہ گیش پولیس ءَ کار ءَ بیتگ وھدے کہ وتکشی ءِ درگت ءَ گیشیں پٹ ءُ پول برجاہ ءَ اِنت-