بندیگیں مردمانی وت منگی تامری درشانانی درگت ءَ کانود چی گشیت؟

بندیگیں ماھل بلوچ ءِ تامر ءِ شنگ کنگ وت در کانودی کار یے – کانود زانتکار

ھبدہ فروری دوھزار ءُ بیست ءُ سَے ءَ چہ شال ءَ زورانسری آوار جنی ءَ پد رند ءَ سی ٹی ڈی ءِ دست ءَ دزگیری زاھر کنگ بوتگیں ماھل بلوچ ءِ کیس ھمک روچ ڈرامہ بوان انت –

سی ٹی ڈی ءَ اے کیس ءِ ھاتر ءَ تنی وھدی چہ آمیدگس ءَ دو رند ءَ ھپت ھپت روچ ءُ دو رند ءَ دھ دھ روچانی ریمانڈ ءِ موکل گپتگ –

بلے پدا مروچی سی ٹی ڈی ءُ بلوچستان سرکار ءِ نیمگ ءَ یک پریس کانفرنس ءِ کنگ بوتگ کہ اودا ماھل بلوچ ءِ سر ءَ وتگڑیں بھتام جنگ بوتگ وھدیکہ سی ٹی ڈی ءِ نیمگ ءَ یک وتگڑیں تامر ءِ ھم شنگ کنگ بوتگ –

اے تامر ءِ تہ ءَ ماھل بلوچ گندگ بیت کہ بازیں چیز ءِ منگ ءَ انت –

بندیگیں یک مردمے تامری درشان ءِ درگت ءَ کانود چی گشیت؟ اے درگت ءَ وھدیکہ دی بلوچستان پوسٹ ءَ گوں کانود زانتے ءَ ھال ءُ اھوال کتگ گڈا آئی ءِ گوشگ انت کہ اے وڈیں چیزانی کنگ ءِ موکل ءَ کانود نہ دنت ءُ ناکہ آمیدگس اے دابیں پہ زور گپتگیں تامراں منیت ءُ ناکہ کانود موکل دنت –

وھدیکہ ما جست گپت کہ تامرے شنگ کنگ ءِ درگت ءَ کانود ءِ موقف چی انت گڈا آھانی گوشگ ات کہ کانود اے دابیں چیزانی ھچ موکل ءَ نہ دنت ءُ اے وڈیں چیز گیرکانودی انت –

آئی ءَ گوشتگ کہ اے وڈیں کار کیس ءَ ھراب کن انت ءُ آمیدگسی نزام ءَ گمراہ کنگ ءِ ھاتر ءَ کنگ بنت چوش کہ سر ءَ سر در کانودی انت –

آئی ءِ گوشگ ات کہ اے وڈیں کارانی کنگ ءَ بائدیں آمیدگس وت سوموٹو گامگیج بہ زوریت ءُ اے کار ءِ کنوکانی سر ءَ کانودی کاروائی بہ کنت –

زانگ بہ بیت بلوچستان ءَ کاؤنٹر ٹیررازم ڈیپارٹمنٹ بزاں سی ٹی ڈی کارانی سر ءَ پیش ءَ ھم لنکک چست کنگ بوتگ وھدیکہ دروگیں میڑاں زورانسری آوار جنگ بوتگیں مردمانی کوش ءِ بگیری ءَ مزنیں کچے ءَ زھر شانی کنگ بوتگ –

بلوچستان ءَ سی ٹی ڈی ءِ نیمگ ءَ اے جوڈ کنگ بوتگیں اے وڈیں بازیں تامرے دیم ءَ اتکگ کہ زورانسری آوار جنگ بوتگیں مردم وتی درشان ءَ دیگ ءَ انت بلے پدا ھم اے کار ءُ آوار جنگ بوتگیں مردمانی وتگڑیں درشانانی بگیری ءَ ھچ وڈیں کانودی گامگیج زورگ نہ بوتگ –