بولان ءَ لشکر کشی برجاہ، تیر ءُ تراکانی ھال

بلوچستان ءِ دمگ بولان ءَ مروچی دوشمبے ءَ پنچمی روچ ءَ ھم پاکستانی پوج ءِ لشکر کشی برجاہ بوتگ –

دی بلوچستان پوسٹ ءِ پتر ءَ سربوتگیں ھالانی رِد ءَ بولان ءَ مروچی پنچمی روچ ءَ ھم پاکستانی پوج ءِ لشکر کشی برجاہ بوتگ –

دمگی ھالانی رِد ءَ بالگرداں مروچی ھم تر ءُ تاب کتگ وھدیکہ بازیں ھند ءُ دمگاں تیرگواری ءُ تراکانی ھم توار بوتگ بلے تنی وھدی ھچ وڈیں تاوانانی ھال نیست –

ھالانی رِد ءَ بزگر، ہنجیر ءُ کش ءُ گوری دمگاں پوج ھنگت ساڑی انت ءُ اے دمگاں بازیں جاہ ءَ پاکستانی پوج ءَ وتی ادارکی بنجل جوڈ کتگ انت –

لشکر کشی ءِ بندات گوستگیں روچاں کنگ بوتگ کہ اودا بالگردانی کمک ءَ بازیں جاہ ءَ پوجی ایر گپتگ انت –

لشکر کشی ءِ درگت ءَ تنی وھدی واکدارانی نیمگ ءَ ھچ وڈیں ھبر شنگ کنگ نہ بوتگ وھدیکہ دمگ ءِ انگر ءِ سوب ءَ ھچ وڈیں جانی ءُ مالی تاوانانی ھال سر بوگ ءَ نہ انت –