لندن ءَ ھندوستان ءِ سپارت ھانہ ءِ سر ءَ زھرشانی کنوکاں ’خالصتان ‘ ءِ بیرک مِک کتگ

انگلینڈ ءِ بنجاھی شھر لندن ءَ ھندستان ءِ سپارت ھانہ ءَ خالصتان ءِ منوکین زھرشانی کنوکاں ھندوستان ءِ بیرک ایر گپتگ ءُ خالصتان ءِ بیرک مک کتگ ءُ چریشی ءَ پد دھلی ءَ برتانیپ ءِ سپیر لوٹائینگ بیتگ ءُ زھرشانی یاداش اش کتگ-

این ڈی ٹی وی ءِ رد ءَ یکمشبے ءِ روچ ءَ لندن ءَ امرت پال سنگھ ءِ ھلاپ ءَ پولیس ءَ بیڑ برگ ءِ ھلاپ ءَ آئی ءِ منوکاں زھرشانی کتگ-

ھندوستان ءِ وزارت ھارجہ ءَ یک درشانے ءَ گوشتگ ’ لندن ءَ ھندوستان ءِ سپارت ھانہ ءَ برتانیہ ءِ سیکیورٹی ءِ ناجاڑیگی ءِ سرجمی ءَ منانک ءِ دیگ ءِ لوٹ لتگ- برتانیہ ءِ سپیر ءَ ویانان کنونشن ءِ تک ءَ برتانیہ ءِ بنکی زمہ واریانی یاداشتی کتگ اَنت-

چاگردی ترامجاھان جاڑیگیں ویڈیو ءَ زھرشانی کنوک ھندوستان ءِ سپارت ھانہ ءِ سر ءَ درکپگ ءُ بیرک ءَ لوڑینگ ءَ اَنت ءُ خالصتان ءِ بیرک ءَ مِک کنگ ءَ گندگ بنت-

ھندوستان ءِ وزارت ءِ ھارجہ ءِ گوشگ اِنت برتانیہ ءِ سرکار ءِ نیمگ ءَ ھندوستان ءِ سپارت ھانہ ءُ اے امل ءِ پھریزداری ءِ داری ءِ درگت ءَ نادلگوشی منگ نہ بیت اِنت-

ھندوستان ءِ ریاست پنجاپ ءَ پولیس ءَ جتائی ءِ سرپد بیوکیں سی سالی ئیں سکھ رھشون امرت پال سنگھ ءِ دزگیر ءِ جھد برجاہ داشتگ ءُ جالندھر ءُ آئی ءِ ھپتاد ءُ ھشت ھمراہ دزگیر کتگ اَنت-

امرت پال سنگھ ءِ نام گوستگیں ماہ ءَ ھالانی سرھال ھما وھد ءَ جوڑ بیتگ کہ زھم، کارچ ءُ توپکاں بستگیں یک مردے ءُ پولیس اسٹیشن ءِ سر ءَ اُرش کتگ ات کہ آئی ءِ مول ءُ مراد ات کہ سکھ رھشون ءِ یک ھمراھے ءِ چُٹینگ بیتگ کہ آ پولیس ءَ دزگیر کتگ-

اے اُرش ءَ بازین کارندھے زدگ بیتگ ات اَنت ءُ چریشی ءَ پد امرت پال سنگھ ءُ آئی ءِ ھمراھانی ھلاپ ءَ بیڑ بندات بیتگ کہ شمبے ءِ روچ ءَ پولیس ءَ امرت پال سنگھ ءِ دزگیر کنگ ءَ بازین جاھاں بیڑ برتگ بلے تنی وھدی آ دزگیر کنگ نہ بیتگ-