پولیس ءَ کراچی پولیس کارگس ءِ سر ءَ ھپدہ فروری ءَ بیتگیں اُرش ءِ ماسٹر مائنڈ ءِ کشگ ءِ ٹاہ داتگ کہ گشتگ بیڑ ءِ وھد ءَ کشگ بیتگ-
سی ٹی ڈی ءِ جارکش ءَ ٹاہ دیان ءَ گوشتگ کہ کراچی ءِ دمگ منگھوپیر ءَ ناردرن بائی پاس ءِ نزیک ءَ بیڑ ءِ وھد ءَ ماسٹر مائنڈ آریاد اللہ ءُ آئی ءِ یک ھمراھے کُشگ بیتگ اَنت-
درشان ءَ گوشگ بیتگ کہ بیران بیتگینانی تہ ءَ دومی مردم ءِ پجار نہ بیتگ ءُ پولیس ءِ گوشگ اِنت بیڑ ءَ دگہ دو مردم گرگ ھم بیتگ اَنت جارکش ءِ رد ءَ دمگ ءَ سی ٹی ڈی ءِ بیڑ برجاہ اِنت-
جارکش ءِ رد ءَ سندھ ءِ وزیر اطلاعات شرجیل انعام میمن ءَ مروچی روچ ءِ ساھت سَے ءَ کراچی ءَ پریس کانفرنس کنت ءُ سی ٹی ڈی ءِ میان ءَ کُشگ بیتگیں مردمانی بارو ءَ رسانکدراں سرپدی دنت –
زانگ بہ بیت گوستگین ماہ ءِ ھبدہ فروری ءَ شاھراہ پیسل ءَ کراچی پولیس ءِ کارگس ءِ سر ءَ اُرش کنگ بیتگ ات کہ چریشی ءَ پولیس ءُ رینجرز ءِ بازیں کارندھے کُشگ ءُ زدگ کنگ بیتگ ات اَنت-
ھال ھالانی تہ ءَ گوشگ بیتگ ات کہ اُرش ءِ وھد ءَ ھپت دزبمب کارمرد کنگ بیتگ اَنت-
پولیس ءِ گون ءَ تیرگواری ءَ یک وت کار اُرشے ءَ وت ءَ وت گوں بمب ءَ تراکینتگ ات کہ چار ادارہ ءَ پد پورسز ءَ آپریشن سرجم کتگ ات ءُ ماڑی سرجم ءُ ساپ کتگ ات – اے اُرش ءِ زمہ واری تھریک تالبان پاکستان ءَ من اتگ اَت-