بلوچ ورنا ءُ زالبول زورانسری آوار جنی ءِ آماچ بوان انت – ماما قدیر بلوچ

بلوچستان ءِ بنجاھی شھر شال ءَ بیگواھیں مردمانی پانکجنیں گل وائس فار بلوچ مسنگ پرسنز ءِ زھرشانی برجاہ، زھرشانی بنجل ءَ مروچی چار ھزار ءُ نُھ سد ءُ ھپتاد ءُ سَے روچ سرجم بوتگ انت –

مروچی چہ مستونگ ءَ سیادی داروکیں سیاسی ءُ چارگردی باسک فقیر محمد بلوچ، محمد انور بلوچ ءُ دگہ مردماں بنجل ءَ اتکگیں بیگواھیں مردمانی کھول ءِ گوم ءَ دلپدردی درشان اِتگ –

ھمے وھد ءَ گل ءِ کمک سرکماش ماما قدیر بلوچ ءَ گوشتگ کہ بلوچ راجی جھد ءِ پژدر ءَ مئے راجداریں باسک آوار جنگ ءُ بندیگ کنگ بوگ ءَ انت ءُ اے درچ ءِ تہ ءَ ھمک روچ گیشی آیان انت –

آئی ءَ گوشتگ کہ بلوچ ورنا ءُ زالبول زورانسری آوار جنی ءِ آماچ بوان انت بلے بلوچ مدامی وتی شھید ءُ بیگواھیں مردماں یات کنگ ءَ انت کہ چہ آھانی ھوسلہ ءَ زانگ بیت بلے دژمن ءِ زوراکی روچ پہ روچ گیش بوان انت چو پیشی وڈا زورانسری آوار جنگ بوتگیں مردمانی ژانگولیں جون ویرانگاں چگل دیگ بوگ ءَ انت –

ماما قدیر بلوچ ءَ گوشتگ کہ ھما زلم زوراکیاں کہ پاکستان بلوچستان ءِ تہ ءَ کنگ ءَ انت گمان کنگ نہ بیت کہ جھان ءِ دگہ ایردستیں راجانی سر ءَ اے وڈ کنگ بوتگ –

ماما قدیر بلوچ ءَ گوشتگ کہ ما شری ءَ زانگ لوٹیت کہ بلوچ ھک ءُ انسانیت ءِ ھاتر ءَ پُرایمنیں جھد کنگ ءَ انت – بلوچ زوراکی سگگ انت ءُ وتی باندات ءِ وشھالی ءِ ھاتر ءَ جھد کنگ ءَ انت – بلوچستان ءِ تہ ءَ پوجی زوراکی نوکیں گپ ءِ نہ انت اشی ءَ ھر یکے سرپد انت ھرکسے کہ بلوچستان ءِ جاور ھالاں چارگ ءَ انت – بلوچستان ءَ چشیں ھند ءُ دمگ ءِ نیست کہ آ پوج ءِ زوراکیانی آماچ نہ انت – ھمک روچ اے گپ الم اشکُنگ بیت کہ لس مھلوک ءِ سر ءَ پوج زوراکی کنگ ءَ انت –