بلوچستان ءِ تیاب دپی شھر گوادر ءَ پاکستانی پوج ءَ یک ورنایے آوار جنگ ءَ پد بیگواہ کنگ بیتگ-
گیشیں ھالانی رِد ءَ گوستگیں شپ ءَ گوادر ءِ دمگ کلانچ ءَ پاکستانی پوج ءَ یک ورنایے آوار جتگ ءُ بیگواہ کتگ-
بیگواہ بیتگیں ورنائے پجّار حمید بلوچ ء بابو محراب نام ءَ چہ بیتگ-
زانگ بہ بیت اشی ءَ ساری اے ورنائے پت ھم پوج ءِ دست ءَ آوار جنگ ءَ پد کُشگ بیتگ-
ورنائے پت بابو محراب پاکستانی پوج ءَ 2014 ءَ آوار جتگ ءُ یک سالے ءَ تاں بیگواہ کنگ ءَ پد یل کتگ اشی ءَ پد یازدہ اگست 2018 یکرندے پد ءَ آوار جتگ ءُ اے رند ءَ کُشتگ ءُ لاش دور داتگ-
اشی ءَ اَبید اے کھول ءَ سیادی داروکیں دگہ لھتے ورناہ آوار جنی ءِ نشانگ کنگ بیتگ اَنت-
حمید ءِ برات حیدر 2012 ءَ پوج ءَ آوار جتگ ءُ اشی ءَ اَبید چار اگست 2014 ءَ ھمے کھول ءَ سیادی داروکیں امیر بکش نامیں مردمے ھم آوار جتگ کہ آ انگت بیگواہ اَنت-