سریاب کتاب جاھے ءِ تہ ءَ ٹولی ءِ گوں لٹ ءُ شپّاگاں پُتر اِتگ ءُ بازیں نودربرے لٹ شاپ کتگ

بلوچستان ءِ بنجاھی شھر شال ءَ سریاب کتاب جاھے تہ ءَ یک ٹولی ءَ گوں لٹ ءُ شپّاگاں پُتر اِتگ – کتاب جاہ ءِ تہ ءَ پُرشت ءُ پروش کتگ، کتاب جاہ ءِ تہ ءِ کارکنوک ءُ پہ وانگ ءَ اتکگیں نودربر لٹ شاپ کتگ انت –

لٹ شاپی ءِ نشانگ بوتگیں نودربرے ءِ گوشگ انت کہ لوڑ کاریز سریاب ءِ کتاب جاہ ءَ یک ٹولی ءِ گوں لٹ ءُ شپاگاں پُتراِتگ انت ءُ مئے سنگت سک باز لٹ شاپ کتگ انت، چریشی ءَ اودا ساڑی ایں نودربر ءُ کار کنوک زدگ بوتگ انت –

زدگ بوتگیں نودربر ءِ گوشگ ات کہ ھمے ٹولی کہ کتاب جاہ ءِ تہ ءَ پُتر اِتگ آھاں کتاب جاہ ءِ بند کنگ ءُ سریاب لٹریری فیسٹیول نہ کنگ ءِ بیھار داتگ –

بلے تنی وھدی سریاب پولیس واکدارانی نیمگ ءَ اے وئیل ءِ درگت ءَ ھچ گوشگ نہ بوتگ –

سریاب کتاب جاہ ءِ واکدار ءُ نودربرانی گوشگ انت کہ سریاب ءِ بس ھمے یکیں کتاب جاہ انت ءُ اشی ءِ سر ءَ اُرش زانت دژمنانی پندلے – دمگی واکدار وئیل ءَ ھواریں مردمانی بگیری ءَ زوتاں چہ زوت کانودی گامگیج بہ زور انت –