نمیرانیں یحییٰ بلوچ ءُ نمیرانیں شعیب بلوچ ءَدروت ندر کن ایں – بی ایل ایف

بلوچ آجوئی لوٹوکیں سلاہ بندیں گل بلوچستان لبریشن فرنٹ ءِ جارکش میجر گوھرام بلوچ ءَ وتی افیشیل ٹیلی گرام چینل آشوب ءَ شنگ کرتگیں دروتی درشان ءِ تہ ءَ گوشتگ کہ بی ایل ایف نمیرانیں یحییٰ بلوچ ءُ نمیرانیں شعیب بلوچ ءَ دروت ندر کنت –

میجر گوھرام ءِ رِد ءَ بیست ءُ ھپت فروری ءِ بیگاہ ءِ ادار پنچ ءَ کیچ ءِ دمگ شھرک ءِ کوھاں دو سرمچار یحییٰ ءُ شعیب بلوچ پاکستانی پوج ءُ ھندی کشندہ ٹولی ءِ کارمنداں گوں ھما وھد ءَ دپ کپتگ انت ءُ جنگ بندات بیتگ وھدیکہ آ بہترم دروازگ کور ءِ کوھاں تر ءُ گرد کنگ ءَ بیتگ اَنت- اے اُرش ادار ءُ نیمے ءَ تاں برجاہ بیتگ ، اُرش ءِ آسر ءَ زورگیریں پاکستانی پوج ءِ باز کارمند ءُ دمگء کشندہ ٹولی ءِ کارمند مرتگ ءُ زدگ بیتگ انت ءُ پہ ماتیں سرڈگار ءِ دیمپانی ءَ بی ایل ایف ءِ ھردو سرمچار شھید بیتگ انت –

میجر ءَ گوشتگ کہ نمیرانیں لیفٹیننٹ یحییٰ پنام سِکے ء رحیم بخش جھمنند شاپک چہ نودربری ءِ وھد ءَ بلوچ راجدوستی ءِ راجکاری ءَ پُرکار بیتگ- آئی ءَ سال دوھزار چاردہ ءَ سلاہ بندیں جھد بندات کرتگ ءُ داں شھیدی ءَ پہ بلوچ سرڈگار ءِ آجوئی ءَ وتی پرز ءَ پیلو کنگ ءَ بیتگ –

جارکش ءَ گوشتگ کہ نمیرانیں شعیب پنام ودار ء دلسرد جھمنند شھرک سال دوھزار ءُ بیست ءُ یک ءِ اگست ماہ ءَ بی ایل ایف ءَ ھوار بیتگ – آئی ءَ جتائیں وھداں چہ وتی جپاکشی ءُ سوھوی ءِ سوب ءَ گَل ءِ تہ ءَ جْوانیں کردے پیلو کرتگ-