پنجاپ یونیورسٹی: بلوچ نودربرانی سر ءَ اُرش، نودربرے زدگ

پنجاپ ءِ بنجاھی شھر لاھور ءَ وانوکیں بلوچ نودربر لٹ شاپ کنگ بوتگ انت، بلوچ نودربر گوں نگیگیں جاوراں نادراھجاہ ءَ سر کنگ بوتگ –

پنجاپ شھدربرجاہ ءِ بلوچ کونسل ءَ مروچیگیں وئیل ءِ درگت ءَ وتی پیس بُک تاک ءَ نبشتگ کہ پنجاپ شھدربرجاہ ءَ وانوکیں تھرڈ سیمسٹر ءِ نودربر یار محمد سر ءَ پنجاپ کونسل ءِ ٹولی ءَ اُرش کتگ ءُ آ سک باز زدگ کتگ –

لٹ شاپی ءَ بلوچ نودربر یار محمد سک باز زدگ بوتگ کہ اے وھدی جناح نادراھ ءَ نگہداشت وارڈ ء الاج کنگ بوگ ءَ انت کہ آئی ءِ سر ءَ بازیں ٹپ ءِ مان انت –

بلوچ کونسل ءِ رِد ءَ مروچی پنجاپ شھدربرجاہ ءَ پشتون کونسل ءُ پنجاپ کونسل ءِ نودربرانی میان ءَ جنگ ءُ چوپ بوتگ کہ چریشی ءَ پد پنجاپ کونسل ءِ ٹولی ءَ بلوچ نودربر لٹ شاپ کتگ انت وھدیکہ اشی ءَ پد پنجاپ پولیس ءَ پد ءَ بلوچ نودربر چہ شھدربرجاہ ءَ دزگیر کتگ انت –

وئیل ءَ پولیس ءَ بازیں پشتون نودربر ءِ ھم دزگیر کتگ ءُ پولیس گس ءَ بند کتگ انت –

زانگ بہ بیت چدوپیسر ھم پنجاپ ءِ جتا جتائیں شھدربرجاھاں بلوچ، سندھی ءُ پشتون نودربرانی سر ءَ لٹ شاپی کنگ بوتگ چدوپیسر ملتان ءَ بہاؤلدین زکریا شھدربرجاہ ءَ بلوچ ءُ پشتون نودربر لٹ شاپ کنگ بوتگ انت –

اے وئیل ءَ دو روچ ساری قائدآعظم شھدربرجاہ اسلام آباد ءَ سدانی کچ ءَ مردماں لٹ ءُ چاکو گون بوتگ ءُ آھاں بلوچ نودربرانی سر ءَ اُرش کتگ کہ اودا پانزدہ نودربر زدگ بوتگ انت کہ آھانی تہ ءَ بازیں نودربرے ھنگت نادراھجاہ ءَ الاج کنگ ءَ انت –

اسلام آباد ءِ وئیل ءَ زدگ بوتگیں نودربر ءِ گوشگ ات کہ پشتون کونسل ءِ بازیں مردماں گوں چاکو ءُ لٹ آں شھدربرجاہ ءَ پتر اِتگ انت بلوچ نودربرانی سر ءَ اُرش کتگ اُرش ءَ بازیں بلوچ نودربر ءِ زدگ بوتگ انت –

قائدآعظم یونی ءَ بلوچ نودربرانی سر ءَ بوتگیں اُرش ءَ پد جاورانی نگیگی ءِ سوب ءَ شھدربرجاہ بند کنگ بوتگ ءُ درسیں ھاسٹل ھالیگ کتگ انت وھدیکہ وئیل ءَ ھواریں شست نودربرانی بگیری ءَ ارزی نبشتہ کنگ بوتگ –