خواجہ مزمل یل کنگ بوتگ

گوستگیں روچاں پاکستانی پوج ءِ دست ءَ زورانسری آوار جنگ بوتگیں براھوئی زبان شائر خواجہ مزمل بلوچ یل بوتگ ءُ وتی گِس ءَ سربوتگ –

آئی ءِ کھول ءِ مردماں خواجہ مزمل ءِ یل بوگ ءِ ھبر راست کتگ ءُ گوشتگ خواجہ مزمل یل بوتگ ءُ وتی گِس ءَ سربوتگ – خواجہ مزمل دو روچ ساری پاکستانی پوج ءَ چہ جند ءِ گِس ءَ زورانسری آوار جتگ ءُ بیگواہ کتگ کہ دوشی شپ یل کنگ بوتگ –

خواجہ مزمل ءِ زورانسری آوار جنی ءِ بگیری ءَ آئی ءِ کھول ءِ مردماں گوستگیں روچ ءَ بیگواھیں مردمانی پانکجنیں گل وائس فار بلوچ مسنگ پرسنز ءِ رھشونانی ھمراھی ءَ شال ءَ پریس کانفرنس ءِ ھم کتگ – پریس کانفرنس ءَ اھوالکاراں گوں تران کنان ءَ خواجہ مزمل ءِ کماش حاجی محمد حنیف ءَ گوشتگ کہ بیست ءُ شش فروری ءِ روچ ءَ من کمبرانی دگ ءِ سر ءَ دکان ءَ نندوک بوتگ انت کہ سی ٹی ڈی ءِ کارمند گاڑیاں سوار بوتگ ءُ اتکگ انت ءُ منی نام ءِ جست کتگ من وتی نام گوشتگ گڈا آھاں مناں گوشتگ کہ گاڑی ءَ سوار بو من گاڑی ءَ سوار بوتگاں گڈا آھاں منی موبائیل پچ گپتگ ءُ گوشتگ کہ مارا وتی گِس ءَ بہ بر، وھدیکہ ما وتی گِس ءِ دپ ءَ رستگ انت گڈا من گوشتگ کہ ایش انت منی گِس گڈا آھاں مناں گوشتگ کہ گاڑی ءَ تہ ءَ بہ نند وت ایر اتکگ انت گِس ءِ تہ ءَ پُتر اِتگ انت – پٹ ءُ پول ءَ پد وھدیکہ آھاں درکانودی ھچ چیز دست نہ کپتگ گڈا آھاں منی چُک دزگیر کتگ آؤرتگ – چریشی ءَ پد ما دمگی تھانہ ءَ شُتگ ایں ارزی داتگ کہ سی ٹی ڈی ءِ کارمنداں منی چمانی دیم ءَ منی زھگ آوار جتگ بُرتگ شما ارزی ءَ نبشتہ ءَ بہ کن ات بلے آھاں منی ارزی نبشتہ نہ کتگ –

زانگ بہ بیت بلوچستان ءِ جتا جتائیں ھند ءُ دمگاں پاکستانی پوج ءِ دست ءَ مردمانی زورانسری آوار جنی ءِ درچ یکشل ءَ برجاہ انت کہ آھانی تہ ءَ کمے کساس ءَ مردم یل کنگ بوتگ انت بلے دومی نیمگ ءَ دوسری آوار جنگ ءُ بیگواہ کنگ بوگ ءَ انت ـ زورانسری آوار جنگ بوتگیں مردمانی تہ ءَ گیشتریں کچ بلوچ نودربر ءُ سیاسی باسکانی انت – زورانسری آوار جنگ بوتگیں بازیں نودربر ءُ سیاسی باسکاں ھوار رھشونانی ژانگولیں جون ھم دست کپتگ انت ءُ بازینے ھنگت گار ءُ بیگواہ انت کہ کس نہ زانت کجا انت ءُ آھانی ھال چی انت –