بیگواھیں مردمانی پانکجنیں گل وائس فار بلوچ مسنگ پرسنز ءِ زھرشانی بنجل ءَ مروچی چار ھزار ءُ نُھ سد ءُ شست ءُ شش روچ سرجم بوتگ انت – مروچی این ڈی پی سندھ ءِ سرکماش ممتاز بروہی، جئے سندھ محاذ ءِ جنرل سیکرٹری عابد حسین حیدری ءُ دگہ ھم ھیالیں سنگتاں بنجل ءَ اتکگ ءُ یکجاھی درشان اِتگ –
ھمے وھد ءَ وائس فار بلوچ مسنگ پرسنز ءِ سرکماش ماما قدیر بلوچ ءَ گوشتگ کہ سوبائی سرکار ءِ گوشگ انت کہ بلوچستان ءَ دراہ پہ شری گوزگ انت، لشکر کشی نہ بوگ ءَ انت، بلوچ پرزندانی زورانسری آوار جنی ژانگولیں جونانی کپگ بند بوتگ بلے اشی ءِ پژدر ءَ زورگپتیں بلوچستان ءَ میڈیا نو گو ایریا ءِ جوڈ کنگ بوتگ، لشکر کشیاں ھزارانی کچ ءَ بلوچ پرزند آوار جنگ بوتگ انت زالبولانی آوار جنی ءِ تہ ءَ گیشی آرگ بوتگ کہ اودا پوج ءِ گسانی ماندارگ ھمک روچی کار ءِ جوڈ بوتگ یا ڈائنامیٹ ءَ گوں لس مردم نشانگ کنگ بنت ءُ آھاں جنگول گوش انت – وھدیکہ یکجاھیں لاشانی ھمراھی ءَ ٹارگٹ کلنگ ءُ ژانگولیں درچانی تہ ءَ گیشی آرتگ –
ماما قدیر بلوچ ءَ گوشتگ کہ پاکستانی سرکار بلوچستان ءِ سرڈگار ءِ تہ ءَ ھستیں بلوچ سنگتانی بگیری ءَ وتی زوراکیاں کنگ ءَ انت ءُ ھمے جھد ءَ انت کجا ناں کجا بلوچاں نشانگ بہ کنت ءُ بلوچ راجی پرایمنیں جھد ءَ نزور ءُ ھلاس بکنت دومی نیمگ ءَ سیاسی گلانی ریاستی انسان کُش پالیسی ترند کنگ بوتگ انت بلے بدبھتی ءَ درسیں ریاستی زوراکیاں ابید گلانی میان ءَ یکجاھی ءُ یکمشتی نیست کہ آھانی سوبانی زانگ ءُ یکجاھیں پلیٹ فارم ءِ بوگ المی انت ایندگہ پاٹیانی ھچ نگوشگ ھم گوستانک ءِ بھر جوڈ بوتگ انت اے مردمانی سر ءَ گرانیں بار ءِ دیگ بہ بیت تانکہ ھدانکواستہ اے دوری دراج کش مہ بیت کہ آئی ءَ پدا واتر بوگ ءَ گران بہ بیت پرایمنیں جھد ءَ پاکستان ءِ زورگپتی برجاہ بہ بیت –