بلوچستان : جتاجتائیں دمگاں چُکے ءَ ھوار ءَ دو مردم بیران دو ٹپی بیتگ اَنت

بلوچستان ءِ جتاجتائیں دمگ شال ، پنجگور ءُ ڈیرہ بگٹی ءَ دگ ءُ تیرگواری ءِ آسر ءَ چُکے ءَ ھوار دو مردم بیران دو ٹپی بیتگ اَنت-

سربوتگیں ھالانی رِد ءَ پنجگور چتکان نوکمپلکس ٹرمینل ءِ نزیک ءَ ناشناسیں مردماں زمیاد گاڑی ءَ یک چُکے لگت داتگ- آئی ءِ پجّار سیزدہ سالی ئیں محمود ء محمد اسحاق عمر جھمنند گدر حال چتکان نام ءَ چہ بیتگ-

وئیل ءِ سبب ءَ چُک ھما دمان ءَ مرتگ-

اِھوالکارانی رِد ءَ بیران بیتگیں چُک دگ ءَ گوازینگ ءِ جُھد کنگ ءَ بیتگ زمیاد گاڑی ءَ لگت داتگ، دیمتر ءَ پٹ ءُ پول پولیس سٹی کنگ ءَ اِنت-

دومی نیمگ ءَ چہ ڈیرہ بگٹی ءَ ھال اِنت کہ نواب بازار ءَ برف شرکت ءِ نزیک ءَ ناشناسیں مردمانی تیرگواری ءَ چہ یک مردمے ٹپی بیتگ، ٹپی ئیں مرد نادُراھجاہ ءَ برگ بیتگ، وئیل سوب زانگ نہ بیتگ-

ھمے وڑ شال ءَ مزنیں مسیت نزیک ءَ ناشناسیں سلاہ بندیں مردمانی تیرگواری ءَ چہ یک مردمے بیران ءُ یکے ٹپی بیتگ-

تیرگواری ءِ آسر ءَ بیران بیتگیں مردم ءِ پجّار نصیب اللہ ء نیک محمد ءُ ٹپی بیتگین ءِ احمد ء عبدالحمید نام ءَ چہ زانگ بیتگ- مردمانی رِد ءَ اُرشکار پرپٹ ءَ سوار بیتگ اَنت آیانی سر ءَ تیرگواری اِش کتگ-

بیران بیتگیں مردم ءِ لاش ءُ ٹپی بیتگیں مردم نادُراھجاہ ءَ برگ بیتگ اَنت ءُ وئیل سوب زانگ نہ بیتگ-