زاھدان ءُ بیرجند ءِ زندناں سَے کس پاھو دیگ بیتگ اَنت

سر بیتگیں ھالانی رد ءَ روکپتی بلوچستان ءِ بنجاھی شھر زاھدان ءِ مزنیں جیل ءَ بندیگیں دو کس پاھو دیگ بیتگ اَنت-

پاھو دیگ بیتگیں مردمانی پجار ھادی اربابی ء احمد ءُ محمد اسحاق گورگیج ء خدارحم جھمنند زاھدان ءِ ناماں زانگ بیتگ اَنت-

ھردوکیں مردم بنداتی ءَ ایرانی سال نود ءُ ھشت ءَ لھتے ایرانی بسیجی بزانکہ پولیسانی کارمندانی ھواری ءَ گرگ بیتگ اَنت –

اھوالانی تہ ءَ گوشگ بیتگ کہ آ دگہ بسیجی آمیدگس ءَ بے گناہ ءُ پھک کتگ ءُ یل داتگ اَنت بلے اے ھردوکیں مردمانی داں چار سال ءِ کساس ءَ بندیگ جاہ ءَ بندیگ کنگ بیتگ اَنت-

اھوالانی تہ ءَ گوشگ بیتگ کہ ھردوکیں مردمانی سر ءَ دو ماہ ءَ پیش ماں زاھدان ءِ آمیدگس ءَ پاھو ءِ ھکم داتگ –

اھوالانی تہ ءَ گوشگ بیتگ کہ ھردوکیں مردم گوستگیں روچ ءَ ما زاھدان ءِ جتائیں کوٹی ءَ برگ بیتگ ءُ اود ءَ آیانی کھولانی گندوک کنگ بیتگ اَنت-

ھالانی تہ ءَ گوشگ بیتگ کہ ھردوکیں مردم مروچی سھب ءَ ما زاھدان ءَ پاھو دیگ بیتگ اَنت-

ھمے وڑ ءَ اُستان حراسان ءَ بیرجند ءَ یک کسے پاھو دیگ بیتگ-

بیر جند ءَ پاھو دیگ بیتگیں مردم ءِ پجار عبدالحمید بھاودین ء شاہ بخش ءِ نام ءَ زانگ بیتگ-

ھالانی رد ءَ گوشگ بیتگ عبدالحمید شاہ بخش دو سال پیش نشہ باپاری ءِ بھتام ءَ گرگ بیتگ –

ھالانی تہ ءَ گوشگ بیتگ کہ عبدالحمید ءِ ھواری ءَ دگہ یک کسے ھم پاھو دیگ بیتگ بلے آئی ءِ نام تنی وھدی زانگ نہ بیتگ-

خراسان اُستان مشھد ءَ زرباری دمگاں اِنت کہ اود ءَ آبادی گیشتر بلوچ اَنت-

دومی نیمگ ءَ بلوچ کمپعن فعالین ءِ رد ءَ روکپتی بلوچستان ءَ یک سد ءُ سَے کسانی رپورٹ سر بیتگ اَنت کہ آ پاھو دیگ بیتگ اَنت-