سر بیتگیں اھوالانی رد ءَ تربت جام زندان ءَ بندیگیں دو بلوچ پاھو دیگ بیتگ اَنت-
پاھو بیست فروری ءَ ماں تربت جام زندان ءَ ایرانی آمیدگس ءَ پاھو ءِ ھکم داتگ ءُ ھردوکیں ورناہ پاھو دیگ بیتگ اَنت-
پاھو دیگ بیتگیں مردمانی پجار بیست ءُ ھشت سالی ئیں علیرضا مھمد پور شاھوزئی ءُ سی ءُ یک سالی ئیں سپرمھمد پور شاھوزئی جھمنند کھندل سالہ آباد ءِ ناماں زانگ بیتگ اَنت-
ھردوکیں مردم ایرانی سال سیزدہ سد ءُ نود ءُ ھشت ھبدہ تیرماہ ءَ ما جنت آباد ءَ نشہ باپاری ءِ بھتام ءَ گرگ بیتگ اَنت-
علیرضا ءُ سپر ماں روکپتی بلوچستان ءَ گوریچانی دمگ ءَ ایران ءِ اُستان مشھد ءَ ھواریں دمگ ھراسان ءَ ماں تربت جام زندان ءَ پاھو دیگ بیتگ اَنت-
ھراسان اُستان ءَ بازیں کچے ءَ بلوچ آباد اَنت ءُ دومی آبادی فارسان ئیگ اِنت کہ گیشترین مردم فارسی گپ کن اَنت-
سیاسی مردمانی گوشگ اِنت ایران سیستان و بلوچستان ءَ ھوار دگہ جاھاں نندوکیں بلوچاں ھم پاھو دیگ اِنت کہ آیاں آمیدگساں وتی سپاھی کنگ ءِ موہ ءَ دیگ ءَ نہ اِنت-
دومی نیمگ ءَ ایران ایمنسٹی انٹرنیشنل ءَ ھم بلوچستان ءَ ھوار ایران ءِ دگہ جاھاں مردمانی پاھو دیگ ءِ سر ءَ زھر درشان کتگ ءُ پاھوانی دارگ ءِ دزبندی کتگ-