شال: ماھل بلوچ ءِ بیگواھی ءِ ھلاپ ءَ زھرشانی برجاہ اِنت

بلوچستان ءِ بنجاھی شھر شال ءَ پاکستانی پوج ءِ دست ءَ بلوچ زالبول ماھل بلوچ ءِ بیگواھی ءِ ھلاپ ءَ کھول ءِ نیمگ ءَ زھرشانی ریڈزون ءَ برجاہ اِنت-

ھمے ماہ ءِ ھپت ءُ ھژدہ فروری ءِ شپ ءَ بلوچستان ءِ بنجاھی شھر شال ءَ پاکستانی پوج ءَ ماھل نامیں بلوچ زالبولے گوں زھگ ءَ چہ جند ءِ لوگ ءَ اوار جتگ ءُ ناشناسیں جاھے ءَ برتگ ءُ پد ءَ مھلوک ءِ زھرشانیاں پد آ کاؤنٹر ٹیررزم ڈپارٹمنٹ ءَ ماھل بلوچ یک اُرشکارے ءِ نام ءَ دزگیری ءِ ھال راست کتگ-

بلے داں انگت ءَ ماھل بلوچ آمیدگس ءَ پیش کنگ نہ بیتگ ءُ ماھل بلوچ ءِ کھول ءُ بلوچ سیاسی تکاں بندوکیں مردماں اے بھتام رد کتگ-

گوستگیں روچ ءَ ماھل بلوچ ءِ کھول ءَ یک رندے پد ءَ کمیشنر ھاؤس ءِ دیم ءَ زھرشانی کنان ءَ ریڈ زون ءَ وتی بنجل جتگ – زھرشانی کنوکاں ھور ءِ رکگ ءِ واستا تمبو جنگ ءِ جھد کتگ گڑا پولیس ءِ بازیں کارمند اتکگ ءُ نندانک اش انگیر کتگ ءُ کش ءُ کائی اش بندات کتگ – آیاں سجوئیں شپ ءَ سارتی ءَ ننداک جتگ ءُ نشتگ اَنت-

کھول ءَ گوشتگ کہ ما ماھل بلوچ ءِ سر ءَ جتگیں دروگیں بھتاماں رد کن ایں آ مئے دیم ءَ چست کنگ بیتگ پد ءَ سی ٹی ڈی ءُ ضیاء لانگو ءَ درستیں دروگ یکجاہ کتگ ءُ شنگ کتگ انت-

دومی نیمگ ءَ بلوچستان ءِ وزیر داکلہ ضیاء لانگو گوش ایت ماھل بلوچ ءِ کیس ءَ سرکار کانونی رنگ ءَ چارگ ءَ اِنت ءُ نندانک ھلاس کنگ بہ بیت سرکار وتی تاکت ءَ پیش داشت کنت-

دسمی نیمگ ءَ کھول سرکاری گپ ءُ دروگاں رد کنگ ءُ یکیں لوٹ ءَ کنگ ءَ اَنت کہ ماھل بلوچ دیم ءَ آرگ بہ بیت –

ھمے وڑ ءَ سرکاری ءِ ھمسنتی پاٹی بلوچستان نیشنل پاٹی ءَ ماھل بلوچ ءِ زورانسری آوار جنی ءِ ھلاپ ءَ شال پریس کلب ءِ دیم ءَ یک شدکشیں ھرتالے جنگ بیتگ ءُ ماھل بلوچ ءِ یل کنگ ءِ لوٹ ءَ کنگ ءَ اَنت-

پد ءَ یک گپے چاگردی رسانکجاہ کارمرد کنوک بی این پی مینگل ءِ جتائیں بنجل جنگ ءِ سر ءَ ایراد گرگ ءَ اَنت اے لوٹ ءَ کنگ ءَ اَنت اسمبلی باسک ءُ پارٹی ءِ باسک ریڈ زون ءَ برجاھیں زھرشانی ءَ کھولانی ھوار بہ بنت ءُ ھمتوار بہ بنت ءُ وتی توار گیش توانمند بہ کن اَنت-