زاھدان: ایرانی لشکر ءِ بندیگ جاہ ءَ لٹ ءُ کُٹ ءَ بندیگیں ورناہ بیران

سر بیتگیں ھالانی رد ءَ روکپتی بلوچستان ءِ بنجاھی شھر زاھدان ءَ بندیگ جاہ ءَ ایرانی لشکر ءِ لٹ ءُ کُٹ ءَ بندیگیں بلوچ ورناہ بیران-

بیران بیتگیں ورنا ءِ پجار بیست ءُ چار سالی ئیں ابراھیم ریگی ء سرور جھمنند زاھدان ءِ نام ءَ زانگ بیتگ-

اھوالانی رد ءَ ابراھیم ریگی سیزدہ اکتوبر سال دوھزار ءُ بیست ءُ دو ءَ ماں زاھدان ءَ زھرشانیانی وھد ءَ دزگیر کنگ بیتگ ءُ سال دوھزار ءُ بیست ءُ سَے یک جنوری ءَ پہ زمانت یل کنگ بیتگ ءُ گوستگیں دو روچاں پیش پد ءَ ایرانی چیریں ادارھاں زاھدان ءَ یک کوچگی ءَ دزگیر کتگ ءُ برتگ-

اھوالانی تہ ءَ گوشگ بیتگ کہ ابراھیم ریگی ءِ آوار جنگ ءُ پد ءَ آئی ءِ لاش ءِ کپگ ءَ پد ڈاکٹرانی ٹپاس ءَ پد چریشی ءَ چہ ڈاکٹراں پدر کرتگ کہ اے مرد بے کساس لٹ ءُ کُٹ کنگ ءُ کشگ بیتگ-

اھوالانی تہ ءَ گوشگ بیتگ کہ ابراھیم ریگی ءِ گُد ءُ جسم ءُ جان ءَ ھونین ءُ ٹپ ءُ ٹور ءُ گد درگ بیتگ اَنت-

اھوالانی رد ءَ ابراھیم ریگی ءِ بیرانی ءَ پد ایرانی پولیس کیس ءِ گار کنگ ءَ کھول ءَ زور دیگ اِنت کہ شما اے گپ ءَ دیم ءَ مہ کش ات ءُ ابراھیم چیریں ادارھاں دزگیر نہ کتگ-

زانگ بہ بیت روکپتی بلوچستان ءِ تیابدپی شھر چھبار ءَ کسان سالیں جنکو ماھو بلوچ ءِ گون ءَ سلکاری ءَ پد روکپتی بلوچستان ءَ یک برانزے چست بیتگ اے کہ چریشی ءَ بازیں کساسے ءَ مردم کُشگ ءُ بیگواہ ءُ زدگ کنگ بیتگ ات اَنت-