وائس فار بلوچ مسنگ پرسنز ءِ چیئرمین نصراللہ بلوچ ءَ چہ سرکار ءَ لوٹ کُتگ کہ ماھل بلوچ ءِ گوں کھول گِند ءُ نند کنائنگ بہ بیت، پرچہ کہ کھول سکیں ذھنی کرب ءُ اذیتءِ تہءَ اِنت، آئی کھول ءَ گوں من نیاد ءَ زنگ جنان ءَ گُشتگ کہ جنزوکیں ھپتگءَ شپ ءَ چہ لوگءَ سی ٹی ڈی ءَ دزگیر کُتگ ءُ آئی دزگیری دومی روچ ءَ سھب ءِ ادار 8 ءَ وتکُشیں تراک کار یے ردءَ پدر کُتگ۔
آئی ءَ وتی درشانے تہءَ سرکار ءَ چہ لوٹ کُتگ کہ زیت ءَ زیت کھول ءِ گوں ماھل ءَ نیاد کنائنگ بہ بیت، ماھل ءِ کھول ءَ باوری داتگ کہ وائس فار بلوچ مسنگ پرسنز ماھل ءِ گوں شرپ ءَ یل کنائنگ ءِ ھاترءَ سرکار ءَ گوں گپ کنگ ءَ ھوار ھمک جاہ ءَ توار چست کنت۔
سی ٹی ڈی ءَ ھمینکس کہ کاروائی بلوچستان ءَ کُتگ اَنت آ درست شکی اَنت، بلوچستان ءَ سی ٹی ڈی ءِ ابید رھبند ءُ گامگیج ءُ دروگیں انکاونٹرزانی تہءَ پیسر ءَ چہ بیگواھیں مردمانی کُشگ ءِ سوب ءَ بلوچستان ءِ مھلوک ءِ تہءَ زھر ءُ گم گندگ ءَ کئیت ءُ نی جنین آدمانی زورانسری بیگواھی ءُ ماھل بلوچ ءَ دروگیں کیسانی تہءَ ھوار گیجگ ءِ سوب ءَ بلوچ راج ءُ بلوچستان ءِ کلیں مھلوک ءِ دل ءَ ڈیھہ ءُ ڈیھی ادارگانی ھلاپ نپرت ءَ گیشی کئیت، پمیشکہ سرکار ءُ ڈیھی ادارگانی سروکاں سنگینی ءِ درشان کنگ لوٹیت ءُ ماھل ءِ سرءَ جتگیں بے بنیں بھتاماں ھلاس بہ کن اَنت ءُ بلوچ جنین ءَ گوں شرپ ءَ یل بہ کن اَنت۔