بلوچستان ءِ دمگ کیچ ءِ ھند مزن بند ءَ پاکستانی پوجءَ مرچیگیں سھب ءَ چہ پوجی بیڑ بندات کُتگ۔
مزن بند ءُ کش ءُ گوری دمگ پوجی بیڑ ءِ آماچ اَنت۔ ھندی اھوالکاراں ٹی بی پی ءَ گُشتگ کہ ھمے ھندانی تہءَ سھب ءَ چہ گن شپ ءُ ایندگہ بالی پرگانی رؤگ آیگ برجاہ اِنت۔
واکداراں داں انگت اے درگتءَ ھچ پئیمیں درشان شنگ نہ کُتگ وھدیکہ دمگ ءَ پوجی بیڑ ءِ برجاھی ءِ سوب ءَ سرجمیں معلوم داری رست نہ کنگ ءَ اِنت۔
یات بہ بیت گوستگیں روچ ءَ مند ءِ بازار موکندر ءُ دوکوپ ءِ نیام ءَ پاکستانی پوج ءِ یک کاروان ءِ سلاہ بندیں مردماں نشانگ کُتگ اَت کہ اِشی آسر ءَ لشکریاں مزنیں کچے ءَ جانی ءُ مالی تاوان رستگ اَت۔
ھمے اُرش ءِ زمہ واری بلوچستان لبریشن فرنٹ ءَ من اِتگ اَت۔ گل ءِ جارکش میجر گھرام ءَ درشانے تہءَ گُشتگ کہ اُرش ءِ تہءَ پاکستانی پوج ءِ ھپت کارندہ کُشتگ اَنت۔
واکدارانی نیمگ ءَ چہ اے بابت ءِ ھچ پئیمیں درشان دیما نئیتکگ اَت البت گوستگیں روچءَ چہ ھمے دمگانی تہءَ لشکریانی رؤگ آیگ برجاہ اِنت۔