زھگ ءُ زالبولانی نشانگ کنگ ءَ بلوچ چہ وتی زرمبشت ءَ دزکش نہ بنت – واحد کمبر

بلوچ آجوئی لوٹوکیں رھشون واحد کمبر ءَ رسانکدراں وتی شنگ کرتگیں درشانے ءِ تہ ءَ گوشتگ کہ زھگ ءُ زالبولانی آوار جنی ءُ کُوش ءَ بلوچ چہ وتی راجی زرمبشت ءَ دزکش نہ بیت انت –

استاد واحد کمبر ءَ ماھل بلوچ ءِ دروگیں ارزی ءُ آئی ءِ دزگیری ءِ پُژدر ءَ وتی درشان ءِ تہ ءَ گوشتگ کہ زھگ ءُ زالبولانی آوار جنی ءُ جنگ ءِ بھر نہ بیتگیں مردمانی کوش جنگی راھبند ءُ اقوام متحدہ ءِ کانودانی بگیری یے – بلوچ اے کانودانی پلامرزی ءَ کنت بلے پاکستانی پوج اے کانوداں مان نیار ایت کہ ایرجنگی اِنت-

آئی ءَ گوشتگ کہ ماھل بلوچ ءَ گوں بی ایل ایف ءَ ھمگرنچ کنگ ءُ وتکُش بمبارے پیشدارگ ءُ رسانکدر ءَ انچیں کسھے پیش کنگ بیتگ کہ جھان ایشی ءِ سر ءَ ھچ وڑ ءَ بیسہ نہ کنت بلے وت پاکستانی شھری ءُ رسانکدر ءِ مردم ھم زان اَنت کہ پاکستانی پوج دروگ بندگ ءَ اِنت- بی ایل ایف ءِ کارانی تہ ءَ وتکُشیں اُرش مان نیست – بی ایل ایف بلوچ راجی آجوئی ءِ جنگ ءَ وتی بستار ءُ مردمگری ءَ ھچبر پُشت ءَ دور دیگ ءِ ردی ءَ نہ کنت- بی ایل ایف جنگ ءِ تہ ءَ زھگ ءُ زالبولاں ناکہ کارمرد کنت ءُ نہ کہ آیاں پہ لشکری کاراں کمکار جوڑ کنت، بلے ھئو پاکستانی پوج چہ بلوچ سرمچارانی دست ءَ پروش ورگ ءَ پد دست گوشیں مردم، زھگ ءُ زالبولاں چہ وتی بیر ءَ گپت –

آئی ءَ گوشتگ کہ پاکستانی استان ءُ بلوچ راج ءِ میان ءَ یک جنگے بوگ ءَ اِنت، بلوچ راج گوں پاکستان ءَ وتی آجوئی ءِ جنگ ءَ مڑگ ءَ اِنت – اے جنگ ءَ ھزارانی کچ ءَ جان ندر بوتگ انت، بلوچ راج ءِ مول ءُ مُراد تچک اَنت کہ سال نوزدہ سد ءُ چِل ءُ ھشت ءَ پاکستان ءَ بلوچستان پہ زور دستیگ کُرتگ ءُ چہ ھما روچاں بلوچستان ءِ سر ءَ آئی ءِ کبزہ برجاہ انت- زھگ ءُ زالبولانی نشانگ کنگ ءَ اے جنگ نہ اوشت ایت اے تجربہ پاکستانی پوج ءَ بنگلہ دیش ءَ ھم کُرتگ کہ اود ءَ آئی ءَبدنامی ءَ گوں پروش وارتگ –

واحد کمبر ءَ گوشتگ کہ پاکستانی پوج ءَ زورگپتیں بلوچستان ءَ زورانسری آوار جنی ،کُشت ءُ کوش بند کنگی انت ءُ وتی ڈیھ ءَ واتر روگ لوٹ ایت- گیشتر ھونریچگ ءَ گھتر اِنت کہ پاکستانی پوج چہ بلوچستان ءِ سیمسر ءَ ڈَن برگ بہ بیت ءُ پاکستان بلوچستان ءِ گون ءَ یک شریں ھمساھگے ءِ وڑ ءَ وت ماں وتی ءِ راھبندانی رد ءَ ایمن بہ بیت – پرچاکہ پاکستانی پوج ءُ پاکستانی استان ءَ جنگ ءِ بدیں آسر دیستگ اَنت، گیشتر ھوریچی ءَ آئی ءَ گیش بدنامی ءَ ابید دگہ ھچ نہ رس ایت –

آئی ءَ گڈسر ءَ وتی درشان ءِ تہ ءَ گوشتگ کہ ما چہ اقوام متھدہ ءُ دمگی توانمنداں لوٹ کن ایں کہ آ پاکستانی پوج ءَ چہ بلوچستان ءَ درکنگ ءَ مسامے بہ منّین اَنت ءُ مردمی بنیاد ءَ زوت دزمانجنی بہ کن اَنت ءُ بلوچ راج ءِ چُکچینی ءَ بہ رکین اَنت –