کیچ ءُ آواران ءَ پاکستانی پوج ءِ سر ءَ اُرش، 7 کارندہ کُشگ بیتگ اَنت، سَے زدگ بیتگ اَنت

بلوچستان ءِ جتا جتائیں دمگ کیچ ءُ آواران ءَ پاکستانی پوج ءِ کاروان ءُ چوکیانی سر ءَ سلاہ بندیں مردماں اُرش کتگ دومی نیمگ ءَ اے اُرشانی زمہ واری بلوچ آجوئی لوٹوکیں گل بی ایل اے ءُ بی ایل ایف ءَ زرتگ اَنت-

بلوچ لبریشن آرمی ءِ جارکش جیئند بلوچ ءَ رسانکدر ءَ شنگ کتگیں درشان ءِ تہ ءَ گْوشتگ کہ مئے سرمچاراں آواران ءِ دمگ مشکے ءَ دو اُرشاں زورگریں پاکستانی پوج نشانگ کتگ ءُ چریشی ءِ آسر ءَ کم چہ کم دُژمن ءِ سے کارندہ ٹپی بیتگ اَنت-

جارکش ءَ گْوشتگ کہ سرمچاراں ریندک ءُ میھی ءِ ھند ءَ برجاھیں دُژمن ءِ دو چوکیانی سر ءَ گرنیڈ لانچر ءَ چہ گولہ آس داتگ اَنت چریشی ءِ آسر ءَ دُژمن ءِ سے کارندہ ٹپی بیتگ اَنت وھدے کہ دُژمن ءَ گیش مالی تاوان چست کنگ کپتگ-

دومی نیمگ ءَ بلوچستان لبریشن فرنٹ ءِ جارکش میجر گوھرام ھم پاکستانی پوج ءِ سر ءَ بیتگیں اُرش ءَ ھپت کارندھانی کوش ءِ زمہ واری من اتگ –

بی ایل ایف ءِ جارکش میجر گْوھرام بلوچ ءَ رسانکدر ءَ شنگ کتگیں درشان ءِ تہ ءَ گْوشتگ کہ کیچ ءِ دمگ مند ءَ سرمچاراں مروچی چارشمبے ءِ روچ ءَ دو ءُ نیم ءَ موکندر ءُ دوکوپ ءِ میانجی ءَ پاکستانی پوج ءِ چار گاڑیانی کاروان سر ءَ راکٹ ءُ وتکاریں سلاھاں چہ نشانگ کتگ اَنت- کاروان ءَ ھواریں گاڑی تاوان داتگ اَنت ءُ اشاں سوار دُژمنیں پوج ءِ ھپت کارندہ مرتگ ءُ بازیں کارندھے ٹپی بیتگ اَنت-

اُرش ءَ پد زورگریں پوج ءِ بُرزی لشکر کشی بندات کتگ- بالگرد مرتگیں ءُ ٹپیانی برگ ءِ ھاتر ءَ وئیلجاہ ءَ سر بیتگ اَنت-

زانگ بہ بیت بلوچستان ءَ پاکستانی پوج ءِ سر ءَ یکشل ءَ بلوچ سلاہ بندیں گلانی نیمگ ءَ اُرش برجاہ اَنت ءُ سلاہ بندیں گلانی گوشگ اِنت اے اُرش ھما وھد ءَ برجاہ بنت دانکہ پاکستانی پوج چہ بلوچستان ءَ در نئیت اِنت –