بارکھان وئیل ءِ ارزی چِل ءُ ھشت اداراں پد نبشتہ، چہ شال ءَ کھیتران دزگیر

بارکھان ءَ زالبول ءَ ھوار سَے مردمانی جون دست کپگ ءَ پد پولیس ءَ دو روچاں پد ناشناسیں مردمانی نام ءَ ارزی نبشتہ کتگ –

بارکھان پولیس ءِ ایف آئی آر ءِ تہ ءَ نبشتہ انت کہ بارکھان ءَ دست کپتگیں زالبول ءَ ھوار ھر سَئیں مردمانی پجار بوتگ انت پولیس ءِ رِد ءَ ھر سَئیں مردم سک باز لٹ شاپ کنگ ءَ پد کُشگ بوتگ انت وھدیکہ زالبول گراناز ءِ دیم ھم کتکاراں سک باز ژانگول کتگ –

ارزی ءِ تہ ءَ نبشتہ انت کہ پولیس ءَ اژدری چار ٹپاس ءَ پد جون کھول ءِ دست ءَ داتگ انت، زالبول گراناز ءِ جان ءَ کیلا ءُ دگہ چیزانی ٹپانی نشان ھست انت –

پولیس ءَ ارزی ءِ تہ ءَ دیمتر ءَ نبشتگ کہ جونانی دست کپگ ءَ پد چہ کھول ءِ نیمگ ءَ ھچ کس ارزی ءِ نبشتہ کنگ ءَ بارکھان پولیس گِس ءَ نہ اتکگ انت ھمے ھاتر ءَ پولیس ءَ وت ارزی ناشناسیں مردمانی نام ءَ نبشتہ کتگ –

نوکتریں ھالانی رِد ءَ بلوچستان پولیس ءَ عبدالرحمان کھیتران دزگیر کتگ –

بلوچستان پولیس ءِ رِد ءَ آھاں سردار عبدالرحمان کھیتران سَے مردمانی کوش ءِ الزام ءَ دزگیر کتگ –

چدوپیش بلوچستان پولیس ءِ ٹولی ءِ ایندگہ بندیگانی یل کنائینگے ھاتر ءَ بارکھان ءَ دیم دیگ بوتگ –

پولیس جارکش ءِ رِد ءَ بارکھان وئیل ءَ ھواریں کتکار کانود ءِ تھتگ ءَ آرگ ءُ اشتارینگ بنت – بلوچستان پولیس ءِ رِد ءَ راستی ءِ دیم ءَ آرگ ءِ ھاتر ءَ آئی جی پولیس وت وئیل ءِ پٹ پولی سروکی ءَ کنگ ءَ انت –

جارکش ءِ رِد ءَ بارکھان جیڑہ ءَ اگاں سروکیں مردمے ءِ دست مان بوت آ ھم کانود ءِ تھتگ ءَ آرگ بیت-