ماھل بلوچ ءِ زورانسری آوار جنی ءُ بارکھان وئیل ءِ بگیری ءَ بازیں جاھاں زھرشانی

بلوچ زالبول ماھل بلوچ ءِ زورانسری آوار جنی ءُ درگیں بھتام ءُ بارکھان وئیل ءِ بگیری ءَ بلوچستان ءَ ھوار دگہ جاھاں زھرشانی ءُ نندانکانی درچ برجاہ انت – درنگاز کنوک وئیل ءَ ھواریں سوبائی وزیر ءِ دزگیری ءِ لوٹ ءَ کنگ ءَ انت –

بلوچ زالبول ءِ زورانسری آوار جنی ءُ کوش ءِ بگیری ءَ مروچی بلوچ یکجھتی کمیٹی ڈیرہ غازی خان ءِ نیمگ ءَ کالج چار راہ ءَ زھرشانی کنگ بوتگ –

ھمے وڈ بلوچ یکجھتی کمیٹی اسلام آباد ءِ نیمگ ءَ ھم مروچی نیشنل پریس کلب اسلام آباد دیم ءَ روانک ءِ کشگ بوتگ –

ڈیرہ غازی خان ءَ درنگاز کنوکانی گوشگ ات کہ سرکار ءِ چیردستی ءَ بلوچستان ءِ تہ ءَ سردار راج ءِ سر ءَ زوراکی کنگ ءَ انت سردار کھیتران ءَ ھوار بلوچستان ءِ دگہ دمگاں سرکار ءِ آشرواد ءَ زندان جوڈ کنگ بوتگ انت کہ اودا لس مردمانی سر ءَ زوراکی کنگ بیت ءُ سرکاری ادارہ اے سردارانی پُشت انت ءُ تنی وھدی بازیں گریب ءُ بزگریں مردمے اے سردارانی زنداناں بندیگ انت –

آھانی گوشگ ات کہ دومی نیمگ ءَ پاکستانی پوج ءِ کارمنداں چہ شال ءَ دست ءُ گوشیں ماھل بلوچ گوں وتی زھگاں زورانسری آوار جتگ ءُ لٹ شاپ کتگ پدا آئی ءِ سر ءَ دروگیں الزام جنگ بوتگ – اے دابیں درکانودی کاراں دیر انت کہ بلوچ زالبولانی سر ءَ کنگ بوگ ءَانت –

پاکستان ءِ بنجاھی شھر اسلام آباد ءَ درنگاز کنوکاں بلوچ زالبول ماھل بلوچ ءِ سر ءَ جنگ بوتگیں دروگیں ارزی ءُ آئی ءِ دزگیری ءَ ترندی ءَ گوں ایر جتگ ءُ آئی ءِ یل کنگ ءِ لوٹ کتگ –

آھانی گوشگ ات کہ بلوچ زالبول ریاستی زوراکیانی آماچ انت ءُ پھریز نہ انت بیگواھیں بلوچانی کھولانی ترسینگ ءَ اے وڈیں کار کنگ بوگ ءَ انت –

دومی نیمگ ءَ بلوچستان ءِ دمگ تربت، ھب، ھزدار ءُ سھبت پور ءَ عبدالرحمب کھیتران زوراکیانی بگیری ءَ زھرشانی کنگ بوتگ –

مری اتحاد ءُ آل پارٹیز کیچ ءِ چیر دستی شھید فدا چار راہ ءِ سر ءَ زھرشانی کنگ بوتگ، درنگاز کنوکاں سردار کھیتران ءِ دزگیری ءُ خان محمد ءِ کھول ءِ ایندگہ مردمانی وش ءُ سلامتی یل کنگ ءِ لوٹ کتگ –

بارکھان وئیل ءَ دو روچ گوزگ ءَ پد ھم ھچ وڈیں گامگیج زورگ نہ بوتگ ءُ ناکہ کشندہ دزگیر کنگ بوتگ انت – دومی نیمگ ءَ کُشگ بوتگیں مردمانی کھول جونانی ھمراھی ءَ شال ءَ سر وزیر سیکٹریٹ دیم ءَ زھرشانی نندانک ءَ نشتگ انت –

بارکھان وئیل ءِ بگیری ءَ گوستگیں روچ ءَ کھول ءَ جون زرتگ ءُ شال ءَ سر بوتگ انت کہ مروچی نندانک ءِ دومی روچ بوتگ – نندانک ءَ نشتگیں کھول ءِ مردمانی گوشگ انت کہ تاں ھما وھد ءَ سردار کھیتران سرکار ءِ تہ ءَ در کنگ ءُ دزگیر کنگ نہ بیت نندانک برجاہ داریں وھدیکہ بارکھان ءَ ھم دمگی مردماں دو روچ انت نندانک ءَ نشتگ انت وئیل ءَ ھواریں سردار ءِ گرگ ءِ لوٹ کنگ ءَ انت –

بلوچستان ءِ باپاری شھر ھب ءَ ھم زھرشانی روانک ءِ کشگ بوتگ کہ اودا ھر تک ءُ پھناتاں سیادی داروکیں مردماں بھر زرتگ ءُ تونسہ شریف ءَ ھم زھرشانی کنگ بوتگ –

زانگ بہ بیت گوستگیں روچ ءَ بارکھان ءِ دمگ حاجی کوٹ سَے مردمانی جون دست کپتگ انت کہ پدا رند ءَ آھانی پجار کنگ بوتگ کہ آ کوھلو ءِ جھمنند خان محمد مری ءِ لوگبانک گراناز، دو زھگ محمد نواز ءُ عبدالقادر ءِ جون انت – اے مردم سوبائی وزیر سردار عبدالرحمان کھیتران ءِ زندانے ءَ دگہ پنچ وارسانی ھمراھی ءَ بندیگ بوتگ انت –

جونانی دست کپگ ءَ پد بلوچستان ءَ زھرشانیانی درچ ءِ بندات کنگ بوتگ ءُ درنگاز کنوک لوٹ کنگ ءَ انت کہ عبدالرحمان کھتران دزگیر کنگ بہ بیت سرکار ءَ در کنگ بہ بیت – وھدیکہ کھیتران ءِ زنداناں بندیگیں خان محمد مری ایندگہ وارسانی یل کنگ ءِ لوٹ ءَ کنگ ءَ انت –