بلوچستان ءِ دمگ آواران ءُ گوادر ءَ پاکستانی لشکریانی سرءَ اُرش کنگ بیتگ۔
سربیتگیں ھالانی بلوچستان ءِ تیاب دپی شھر گوادر ءَ مروچی سھب ءَ ناشناسیں مردماں پاکستانی لشکریانی سرءَ اُرش کُتگ۔
گیشتریں ھالانی ردءَ گوادر ءِ ھنکین جیمڑی ءَ ناشناسیں مردماں پاکستانی لشکری یک بمب تراکے ءَ نشانگ کُتگ اَنت۔
سرکاری بنشون ءَ اُرش ءِ ھال راست کنان ءَ گُشتگ کہ اُرش ءِ تہءَ سئے کارندہ ٹپی بیتگ اَنت۔
دومی نیمگ ءَ ھندی اھوالانی ردءَ اُرش ءَ پد وئیل جاہ ءَ لشکریانی مزنیں کساس ءِ سر بیتگ ءُ لشکریاں ھمے ھند ءُ کش ءُ کوراں بیڑ بندات کُتگ، بیڑءِ تہءَ پادانی پوجی ٹولیاں ابید بالی پرگ ھم بھر زیرگ ءَ اَنت۔
دومی نیمگ ءَ بلوچستان ءِ دمگ آواران ءَ ناشناسیں مردماں پاکستانی لشکریانی چوکیانی سرءَ اُرش کُتگ۔
اھوالانی ردءِ آواران ءِ ھنکین مشکے ءَ بستگیں دو پوجی چوکی ناشناسیں سلاہ بندیں مردماں اُرشانی نشانگ کُتگ اَنت۔ لشکریانی بنجل مشکے ءِ ھندءَ دوشی شپ ءَ ادار نُھ ءِ وھدءَ ریندک ءُ میئی ءِ ھند ءَ بستگیں چوکیانی سرءَ ارش کنگ بیتگ۔
ھندی اھوالانی ردءَ اُرش ءِ وھدءَ بمب تراک ءُ تیر گواری ءِ ترندیں توار اُش کنگ بیتگ اَنت۔
اھوالانی ردءَ اے اُرشانی تہءَ لشکریاں مزنیں تاوان ءِ دیمپانی کنگ کپتگ، وھدیکہ پوجی واکدارانی نیمگ ءَ داں انگت ھچ پئیمیں درشان دیما نئیتکگ۔
زانگ بہ بیت اے ھندانی تہءَ بلوچ آجوئی لوٹوکیں سلاہ بندیں گل سرپُر کنگ ءَ اَنت البت اے اُرشانی زمہ واری داں انگت ھچ گل ءَ نہ من اِتگ۔