ماھل بلوچ ءِ زورانسری آوار جنی ءِ بگیری ءَ تربت ءُ کراچی ءَ زھرشانی

بلوچستان ءِ بنجاھی شھر شال ءَ ماھل بلوچ ءِ زورانسری آوار جنی ءُ پدا آئی ءِ سر ءَ جنگ بوتگیں دروگیں ارزی ءِ بگیری ءَ تربت ءَ بی وائی سی، نودربر، سول سوسائٹی نیمگ ءَ زھرشانی روانک ءِ کشگ بوتگ وھدیکہ کراچی ءَ ھم بلوچ یکجھتی کمیٹی ءِ نیمگ ءَ زھرشانی ءُ روانک کشگ بوتگ –

بلوچستان ءِ دمگ کیچ ءِ بنجاھی شھر تربت ءَ مروچی دو شمبے ءِ روچ ءَ مزنیں کچے ءَ زالبول ، نودربر ءُ لس مھلوک ءَ عطا شاد ڈگری کالج ءَ بگر تاں شھید فدا چار راہ ءِ سر ءَ روانک ءِ کش اِتگ ءُ زھرشانی کتگ –

درنگاز کنوکانی دست ءَ ماھل ءِ اکس ءُ پلے کارڈ بوتگ انت – درنگاز کنوکاں ماھل بلوچ ءِ سر ءَ جنگ بوتگیں دروگیں ارزی ترندی ءَ گوں ایرجتگ ءُ گوشتگ کہ چدوپیش سی ٹی ڈی ءَ باز براں مردمانی نام ءَ وتگڑیں ارزی نبشتگ کُتگ بلے پدا رند ءَ آ دروگ زانگ بوتگ انت –

آھانی گوشگ ات کہ پاکستانی پوج سی ٹی ڈی ءَ چدوپیسر بلوچ زالبول نورجان ءُ حبیبہ پیرجان ھم زورانسری آوار جنگ ءُ بیگواہ کنگ بوتگ انت پدا آھانی سر ءَ ھمے وڈ وتگڑیں ارزی نبشتہ کنگ بوتگ کہ پدا رند ءَ دروگ زانگ بوتگ انت نوں ھما وڈ ماھل ءِ گوم ءَ کنگ بوگ ءَ انت کہ اے درکانودی ءُ ایرجنگی انت –

دومی نیمگ ءَ بلوچ یکجھتی کمیٹء کراچی ءِ نیمگ ءَ کراچی پریس کلب ءِ دیم ءَ زھرشانی ءِ کنگ بوتگ کہ اودا مزنیں کچے ءَ راجداریں گل، سوشل ایکٹوسٹ ءُ انسانی ھکانی باسکاں بھر زرتگ –

زانگ بہ بیت ھبدہ ءُ ھژدہ فروری ءِ میانی شپ ءَ ادار یانزدہ ءِ نزیک ءَ پاکستانی پوج ءَ بلوچستان ءِ بنجاھی شھر شال ءَ بلوچ زالبول ماھل بلوچ گوں ھمراھے زھگاں چہ جند ءِ گِس ءَ زورانسری آوار جتگ ءُ بیگواہ کتگ –

بیڑ بری ءِ دومی روچ ءَ بلوچ گل ءُ انسانی ھکانی ترندیں زھرشانیانی سوب ءَ سی ٹی ڈی ءِ واکداراں بلوچ زالبول ءِ دزگیری منّ اِتگ ءُ آئی ءِ سر ءَ بازیں ارزی ءِ نبشتگ کتگ –

سی ٹی ڈی ءِ جارکش ءَ رسانلدراں وتی شنگ کرتگیں درشانے ءَ ٹاہ داتگ کہ آھاں شال ءِ دمگ سیٹلائٹ ٹاؤن لیڈیز پارک ءِ نزیک ءَ کاروائی کنان ءَ بی ایل ایف ءِ یک وتکشیں ارشکاریں زالبول ءِ دزگیر کتگ – سی ٹی ڈی ءِ رِد ءَ زالبول ءِ گور ءَ آھاں وتکشی کوٹ ءِ گوں چار کلو تراکناکیں شورواں دستیگ کتگ –

بلے آئی ءِ کھول ءَ ماھل ءِ ڈن ءَ دزگیری ھبر دروگ کتگ ءُ گوشتگ کہ ماھل پوج ءَ چہ جندے گِس ءَ زھگانی ھمراھی ءَ آوار جتگ ءُ پدا رند ءَ آئی ءِ سر ءَ دروگیں بھتام جنگ بوتگ –

ماھل بلوچ ءِ زورانسری آوار جنی ءُ پدا رند ءَ آئی ءِ سر ءَ جنگ بوتگیں دروگیں بھتامانی بگیری ءَ بلوچستان ءِ جتا جتائیں دمگاں زھرشانیانی درچ برجاہ انت گوستگیں روچءَ شال سریاب دگ بلوچ وومن نیمگ ءَ زھرشانی نندانک ءِ کنگ بوتگ کہ پدا رند ءَ واکدارانی گند ءُ نند ءَ پد ننداک ھلاس کنگ بوتگ –

ماھل بلوچ ءِ تُرو ءَ شال ءِ نندانک ءِ سر ءَ وئیل درگت ءَ گوشتگ کہ پاکستانی پوج ءَ مئے گِس ءَ بیڑ برتگ بیڑ ءِ میان ءَ مارا دگہ کوٹی ءَ بند کتگ ءُ ماھل دگہ کوٹی ءَ برگ بوتگ ءُ آ لٹ شاپ کنگ بوتگ –

ماھل بلوچ ءِ درکانودی آوار جنی ءِ بگیری ءَ نودربر ءُ سیاسی گلانی نیمگ ءَ بلوچستان ءَ ھوار پاکستان ءِ دگہ شھراں زھرشانی کنگ ءِ جار جنگ بوتگ – درنگاز کنوکاں لوٹ کتگ ءُ گوشتگ کہ ماھل بلوچ ءِ سر ءَ جنگ بوتگیں ارزی ھلاس کنگ بہ بنت ءُ آ یل کنگ بہ بیت ءُ بلوچستان ءَ یکجاھیں سزا ءَ زالبولانی نشانگ کنگے کار یل کنگ بہ بیت-