ھاش: چیریں ادارھانی دست ءَ یک مردمے دزگیر کنگ ءَ پد بیگواہ

روکپتی بلوچستان ءِ دمگ ھاش ءَ ایرانی چیریں ادارھاں یک مردمے دزگیر کنگ ءَ پد بیگواہ کرتگ-

گیشیں ھالانی رد ءَ آدینگ ءِ روچ ءَ ھاش ءِ ھند اکبر آباد ءَ ایرانی چیریں ادارھاں یک ورنایے دزگیر کنگ ءَ پد ناشناسیں جاھاں برتگ ءُ پد ءَ آئی ءِ درگت ءَ ھچ ھال نیست اِنت-

آوار جنگ بیتگیں مردم ءِ پجار امین مراد زئی ء عبدالرؤف جھمنند اکبر آباد ھاش ءِ نام ءَ زانگ بیتگ-

آئی ءِ کھول ءِ گوشگ اِنت امین ایرانی چیریں ادارگاں ابید ارزی گرزی ءَ دزگیر کتگ ءُ برتگ –

آیانی گوشگ اِنت مروچی سَے روچ ءِ گوزگ ءَ پد ھم آئی ءِ درگت ءَ ھچ ھال نیست اِنت –

زانگ بہ بیت روکپتی بلوچستان ءَ گوستگیں سال ءِ رپورٹ ءِ توک ءَ سَے سد ءُ پنچ مردم آوار جنگ ءُ بیگواہ کنگ بیتگ اَنت-