روکپتی بلوچستان ءِ جتا جتائیں جاہ زاھدان ءُ ھاش ءَ بلوچ زالبول ءُ دگہ بیگواھیانی ھلاپ ءَ زھرشانی کنگ بیتگ –
گیشیں ھالانی رد ءَ روکپتی بلوچستان ءِ بنجاھی شھر زاھدان ءَ مکی میست ءَ آدینگ ءِ نماز ءَ پد نمازیاں زھرشانی کنان ءَ بینر ءُ پکے کارڈ چست کتگ اَنت-
زھرشانی کنوکاں خامنہ ای سرکار ءِ ھلاپ ءَ اوگام جتگ ءُ ایشی ءِ ھواری ءَ ’ ھر کس ءَ مئے برات کُشتگ اَنت آیاں ماں کُش ایں ‘ –
زھرشانی کنوکانی ھواری ءَ بلوچ زالبولاں ھم بھر زرتگ ءُ خامنہ ای سرکار ءِ ھلاپ ءَ اوگام جتگ ءُ زالبولانی بندیگ کنگ ءِ ھلاپ ءَ ترندیں اوگام جتگ-
ھمے وڑ ءَ ھاش ءَ ھم نماز ءَ مھلوک ءَ زھرشانی کتگ ءُ بیگواھیانی یل کنگ ءِ لوٹ کتگ –
ھمے رنگ ءَ اُستان گالیش ءَ ھم مولانا مھمد حسین گورگیج ءِ پلامرزی ءَ زھرشانی کتگ ءُ سرکار ءِ ھلاپ ءَ اوگام جتگ-
زانگ بہ بیت روکپتی بلوچستان ءَ گوستگیں سال ءِ ستمبر ءَ بگر داں انگت ءَ ھمک آدینگ ءَ یکشل ءَ زھرشانی بوگ ءَ اَنت کہ آیانی لوٹ اِنت سِی ستمبر ءَ زاھدان ءَ ایرانی لشکر ءَ پُرایمنیں زھرشانی کنوکانی سر ءَ تیرگواری کتگ ءُ اود ءَ سدانی کچ ءَ مردم کُشتگ ءُ زدگ کتگ اَنت-