عبدالقدوس قمبرانی زورانسری آوار جنی ءِ بگیری ءَ لسبیلہ یونی ءَ زھرشانی

لسبیلہ یونیورسٹی آف ایگریکلچر واٹر اینڈ میرن سائنس اُتھل (لومز) ءَ نودربراں زورانسری آوار جنگ بوتگیں نودربر قدوس قمبرانی ءِ وش ءُ سلامتی یل کنگ ءِ ھاتر ءَ شھدربر جاہ ءِ تہ ءَ روانک ءِ کش اِتگ ءُ وتی زھرشانی نبشتہ کنائین اِتگ –

زھرشانی ءَ مزنیں کچے ءَ جنک ءُ بچکیں نودربراں بھر زرتگ ءُ درنگاز کنوکاں پلے کارڈ دست ءَ بوتگ انت کہ آھانی سر ءَ نودربر ءِ یل کنگ ءُ زورانسری آوار جنی ءِ نارہ نبشتہ بوتگ انت –

اے درگت ءَ زھرشانی کنوکیں نودربرانی گوشگ ات کہ زورانسری آوارجنیانی درچ یکشل ءَ برجاہ انت، آوار جنوکاں نودربرانی آوار جنی ءِ تہ ءَ گیشی آرتگ ما ھمے پھمیں کہ اے وڈیں جاورانی پیداک کنگ بلوچ نودربرانی بگیری ءَ زانت دژمنی راج ءِ برجاہ دارگ ناھکی یے –

آھانی گوشگ ات کہ یکشل ءَ بلوچ نودربر آوار جنگ بوگ ءَ انت ریاست ءِ درکانودی پالیسیاں مارا لاچار کتگ کہ دگانی سر ءَ در بیا ایں، ریاست ءِ پالیسی ءِ لوٹ ھمیش انت کہ بلوچ نودربراں چہ زانت ءَ دور بہ داریت –

آھانی گوشگ ات کہ ملک ءِ سر ءَ ھنچیں زوراک اتکگ انت کہ آھاں بید زلم کنگ ءَ دگہ ھچی نہ ایت – ھنگت ھم وھد ھست کہ بلوچانی سر ءَ وتی زوراکیاں بند بہ کن انت – زورانسری آوار جنگ بوتگیں نودربراں ایندگہ مردم یل کنگ بہ بنت ءُ آمیدگس ءَ آرگ بہ بنت –

زانگ بہ بیت لومز ءِ نودربر عبدالقدوس قمبرانی چہ شال ءَ یک ھوٹلے ءِ تہ ءَ بیست ءُ ھشت دسمبر ءَ ناشناسیں سلاھبندیں مردماں زورانسری آوار جتگ گاڑی تہ ءَ سوار کتگ ءُ گوں وت برتگ کہ ھما انت گار ءُ بیگواہ انت –

بیگواھیں نودربر ءِ کھول ءِ گوشگ انت کہ آئی ءَ ماھے ءُ پانزدہ روچ ءَ گیش انت بلے آئی ءِ درگت ءَ ھچ وڈیں ھال اھوال نیست –

اھوالکار ءِ گوشگ انت کہ عبدالقدوس ءَ وتی چکاس داتگ ءُ چُٹیانی گوازینگ ءَ شال ءَ وتی گِس ءَ شُتگ بوتگ – ھما شپ ءَ وتی سنگتانی گوم ءَ بازار شتگ کہ اودا آوار جنگ ءُ بیگواہ کنگ بوتگ –

نودربراں زورانسری آوار جنگ بوتگیں نودربر ءِ وش ءُ سلامتی یل کنگ ءِ لوٹ کتگ ءُ گوشتگ کہ بلوچستان ءَ زورانسری آوار جنیانی درچ دارگ بہ بیت آھانی گوشگ ات کہ اگاں مئے سنگت زاھر کنگ نہ بوت گڈا ترندیں زھرشانی ءِ راہ ءَ وتیگی کن ایں –