بلوچستان : دو جتاجتائیں دمگاں پاکستانی پوج ءُ پولیس ءِ سر ءَ بمب اُرش بیتگ

بلوچستان ءِ دو جتائیں دمگ کیچ ءُ شال ءَ ناشناسیں سلاہ بندیں مردماں پاکستانی پوج ءُ پولیس کارندھانی سر ءَ بمب اُرش کتگ ءُ دومی نیمگ ءَ اے اُرشانی زمہ واری بلوچ آجوئی لوٹوکیں سلاہ بندیں گل بی ایل اے ءُ بی آر جی ءَ زرتگ اَنت-

بلوچ لبریشن آرمی ءِ جارکش جیئند بلوچ ءَ رسانکدر ءَ شنگ کتگیں درشان ءِ تہ ءَ گْوشتگ کہ مئے سرمچاراں گوستگیں روچ ءَ زامران ءِ دمگ تگران ءَ کرپاسی ءِ ھند ءَ زورگریں پاکستانی پوج ءِ کارندھانی سر ءَ ھما وھد ءَ یک چیرکتگیں بمبے ءَ نشانگ کتگ اَنت وھدے کہ آ پرپٹ ءِ سر ءَ گشت کنگ ءَ بیتگ اَنت، تراک ءِ آسر ءَ دُژمن ءِ دو کارندہ ھما دمان ءَ مرتگ اَنت وھدے کہ آیانی پرپٹ سرجم ءَ تباہ بیتگ-

بلوچ لبریشن آرمی اے اُرش زمہ واری ءَ منّ اِیت – چہ بلوچستان ءَ دُژمنیں پوج ءِ سرجمی ءَ دراھگ تاں مئے اُرش برجاہ بنت-

بلوچ ریپبلکن گارڈ ءِ جارکش دوستین بلوچ ءَ رسانکدر ءَ شنگ کتگیں درشان ءِ تہ ءَ گْوشتگ کہ مئے سرمچاراں مروچی شال ءَ زورگریں پاکستانی پولیس فورس ءِ یک بمبے ءَ نشانگ کتگ-

جارکش ءَ گْوشتگ کہ سرمچاراں شال کوٹ تھانہ ءِ سر ءَ دستی بمب اُرشے کتگ تراک ءِ آسر ءَ پولیس ءِ دو کارندہ ٹپی بیتگ اَنت وھدے کہ ماڑی ءُ گاڑیاں تُرندیں تاوان رس اِتگ-

دوستین بلوچ ءَ گْوشتگ کہ مئے گل اے اُرش زمہ واری ءَ منّ اِیت زورگریں پاکستانی پوج چہ بلوچستان ءَ دراھگ ءَ تاں مئے اُرش برجاہ بنت-