کیچ : ساچان گرائمر وانگجاہ ءِ اولی پیرویل مراگش

کیچ ءِ بنجاھی شھر تربت ءَ ساچان گرائمر وانگ جاہ ءِ دھمی تبک ءِ نودربرانی ھاتر ءَ اولی پئیرویل مراگش برجم دارگ بوتگ کہ ساچان گرائمر اسکول ءِ اولی بیچ ھلاس کنگ بوتگ – مراگش ءَ گچینی مھمان ایسوسئیٹ پروفیسر ڈاکٹر طاہر حکیم ءَ ھوار نودربر ماسٹر ءُ نودربرانی کھولاں بھر زرتگ –

مراگش ءِ بندات گوں قران مجید ءُ نات وانی ءَ بوتگ کہ پدا رند ءَ جنک ءُ بچکیں نودربراں جتا جتا بلوچی دوچاپی پیش داشتگ، نودربرانی نیمگ ءَ ٹیبلو ءُ ڈرامہ ھم پیش کنگ بوتگ ، کسانیں نودربراں بلوچی گانایے سر ءَ بلوچی ناچ ھم کتگ ءُ وتی ازم پیش داشتگ – مراگش ءَ کسانیں جنک ءُ بچکیں نودربراں بلوچی گدانی دوچ “فیشن ڈیزائن” ھم پیش داشتگ – اشی ءَ ابید دھمی تبک ءِ نودربراں وتی ایکسپئیرنس ھم گوشتگ انت ءُ دگہ نودربراں تران کتگ –

مراگش ءَ تران کنان ءَ ڈاکٹر طاہر حکیم ءِ گوشگ ات کہ ساچان گرائمر اسکول ءَ کہ سال دوھزار ھژدہ ءَ وتی سپر بندات کتگ ات ءُ مروچی آئی ءَ پنچ سال انت کہ مرچی آ وتی اولی بیچ ءَ پارگ کنگ ءَ انت – اے پہ یک اسٹیٹیوشن ءِ واست ءَ کسانیں مدتے بلے ھمے کسانیں مدتے تہ ءَ مروچی مراگش ءِ کہ سیگمنٹ پیش کنگ بوتگ انت اشانی چارگ ءُ گندگ ءَ پد مردم اے گپ ءَ گُشیت کہ اگاں مردمے کر ءَ کمنٹمنٹ بہ بیت گڈا مردم زوت وتی ھما گول ءَ بزاں مکسد ءَ گپت کنت –

ڈاکٹر ءَ تران کنان ءَ گُشت کہ تالیم ءُ اِلم دو ھنچیں کار انت کہ اشانی بنکی زمہ داری ریاست ءِ انت کہ بائدیں ریاست مردماں اے چیزاں مپت ءَ بہ دنت بلے بدکسمتی ءَ مئے گور ءَ الٹا انت – پرائیوٹ سیکٹر ءَ اے چیز ردوم زوران انت دیما روان انت- بلے پرائیوٹ سیکٹر ءِ تہ ءَ لھتے ھنچیں ادارہ بنت کہ آ بزنس ءِ ھساب ءَ نہ بنت آ کنٹیبوٹ ءِ ھساب ءَ جوڈ بنت آھانی گول آھانی مشن ءُ وژن کلئیر بیت کہ مار ءَ چاگرد ءَ چی دئیگی انت، زر وا رسیت بلے ھمیشی ھمراھی ءَ ما وتی چاگرد ءَ وتی مھلوک ءَ چی دات کناں ـ ما چونیں وژنری لیڈر بزاں چاگرد ءِ ھر تک ءُ پھناتاں باندات ءَ رھشونی کنگ ءُ پھریزگ –

ڈاکٹر گُشت کہ یک پتے ءُ ماتے وتی چک ءَ سرمایہ ٹیچر ءِ اسکول ءِ دست ءَ نہ دات بلکنہ آ وتی کیپیٹل ءِ ھم انوسٹ کنت کہ اے آئی ءِ باندات انت – ھمے باندات ٹیچر ءِ دست ءَ انت اسکول ءِ دست ءَ انت ھاسکر پرائمری ءَ کہ گونڈو کئیت آئی مجگ ھالیگ انت آ ھچ نہ زانت نوں اے ماسٹر ءِ کار انت کہ ماسٹر چونین یے ، انسٹیٹیوٹ چونین یے اگاں آئی ءِ مشن ءُ وژن کنٹیبیوٹ کنگ انت گڈا آ گونڈو ءَ ھمے لائن ءَ زوریت آئی ءِ زمہ واری بیت کہ آئی ءِ تہ ءَ کمنٹمنٹ، کپیٹنسی پیداک کنت کہ باند ءَ آ آؤکیں باندات ءِ چیلنج ءُ لوٹاں بہ زانت سرپد بہ بیت –

آئی ءَ گشت الم ءَ مئے گور ءَ کار ءِ ھاتر ءَ زوریت بزاں وان ءُ کار بگر اے واست ءَ نہ بیت کہ ایجوکیشن فار نالج ـ زانت تئی گور بیت، اسکل تئی گور بیت کار تر ءَ وت رسیت ـ مئے گور ءَ ھما سیکنڈری انت ما پرائمری کتگ ءُ پرائمری ما وتی سیکنڈری ابجکٹ کتگ –

مراگش ءِ گڈسر ءَ نودربر دلبڈی ءُ داد دیگ بوتگ انت ءُ مراگش آسر کنگ بوتگ –