دِرَچک!
نبشتہ کار: ڈاکٹر شکیل بلوچ
دی بلوچستان پوسٹ
یک سر سَبز ءُ شادابیں دِرَچکے ءِ سر سبز بوَگ ءِ تہ ءَ مزنیں کِرد آئی ءِ روتگانی اِنت۔ اگاں یک درچکے ءِ روتگاں ولگوج بِہ کن ئے گُڑا میزان میزان ءَ آئی ءِ سَبزکیں تاک گِیمران بِہ اَنت ءُ گُڈسر ءَ دِرَچک ھم ھُشک بیت ءُ مِر اِیت۔
اگاں کسّے دِرَچک ءِ ٹالاں بِہ گُڈ اِیت بلے دِرچک ءِ روتگ کہ مُھکم اَنت گُڑا درچک الّم دوبر بَرّ ءُ بُور کنت ءُ رُدوم زُور اِیت۔
ھمے پیم ءَ یک جُنزے ءِ واست ءَ ، یاکہ یک پارٹی ءِ واست ءَ وَرنایانی وانندھیں گل (تنظیم) روتگ ءِ بستار ءَ اِنت۔
اگاں ورنایانی گل نِزور بِہ بیت گُڑا باندات ءِ روچ ءَ تئی راجی کجام ھم جُنزے بِہ بیت آ نِزور بوان بیت ءُ ھلاس بیت۔ گُڑ سر ءَ آئی ءِ سَر اَھتگیں زمہ واریں رھشون ھم دِلپروش بوان بَہ اَنت۔
اِے اھد ءِ تہ ءَ لھتیں انچیں سرشونی (پالیسی) اڑ کنگ بوتگ ءُ دِیناں داسِی لَھتیں انچیں کِرد نودربرانی نیام ءَ دیم دیگ بوتگ اَنت کہ آیانی سر ءَ گپ کنگ ھم نہ بیت۔ اِے جْوڑ کرتگیں کِرداں راج ءِ تہ ءَ وتی بْیسہ انچش مُھکم کرتگ کہ اِے کِرد ورنایاناں وت مَہ وت مْیڑینگ ءَ اَنت، آیانی تہ ءَ بْے بْیسَھی (بے یقینی ءُ غیر اعتمادی) ودّینگ ءَ اَنت۔ ھما وَرنا کہ آ پہ بزّگیں مھلوک ءَ کارے کنگ لْوٹ اَنت آیانی سر ءَ وڑ وڑیں بُھتام جنگ ءُ آیانی دامن ءَ پْولنگ کنگ ءَ اَنت، تاں کہ لس مھلوک ءِ بْیسہ ھلاس بِہ بیت، تاںکہ دیمتر ءَ آ وتی بے نپیں کاراں سرجم کرت بِہ کن اَنت ءُ بلوچ ورنایاناں دِلپروش بِہ کن اَنت۔
بَلے مَروچی وش بھتی ءِ گپ اْیش اِنت کہ اِے کردانی اِلزام ءُ بُھتام بے تاگت بوان اَنت، آ پَھک ءَ پَدّر ءُ زانگ اَنت، آ وتی بدیں واھگاں انچش پہ ارزانی ءَ سرجم کرت نہ کن اَنت۔
اِے گپ ءَ من مروچی سِتک گْوش اِیں کہ راستیں راہ ءِ دیم ءَ کجام ھم شکس پہ بدیں نیّت ءَ بیت گُڑا آ وتی گْوں بے نپیں واھگاں کدی سوبمَنْد بوت کرت نہ کنت۔ مروچی اھد سازیں سنگتانی سر ءُ الزام ءُ بُھتام کُل بے نپ ءُ بے تاگت بوان اَنت، اِے کارروان وتی ھساب ءَ دیم ءَ منزل جُنزان اِنت۔
اِِے اھد ءَ مئے سَر بُرزیں سنگتانی دیم ءِ مِکّ کرتگیں اڑ ءُ جنجالاں من گِندگ ءَ اوں، من ءَ وتی دوستیں ھمبل شائر امجد بیکس ءِ اِے شِئر یات آیگ ءَ اِنت-
“سر ءَ تاں پاد ءَ سُتکگاں من بور ءُ بَر بیتگاں”
“چے چے نہ گْوَشتگ اِش من بور ءُ بَر بیتگاں”
“تھارماھی ءَ سپر کناں پہ گلیں سباہ ءِ بامے ءَ “
“راہ ءِ تیماریں ڈنگراں اڑتگاں من بور ءُ بَر بیتگاں”
“چے چے نہ سگتگ پہ مرادانی مِنزل ءِ شوھازگ ءَ “
” تلاریں کوھاں سر کپتگاں من بور ءُ بر بیتگاں”
“چہ سرمستیں اِشک ءِ کِد ءَ سِستگاں ءُ رپتگاں”
” گوں ماہ ءُ استالاں سپر کناں من بور ءُ بر بیتگاں”
اَھد سازیں سنگتاں من کْوھیں سلام پْیش کن اِیں کہ آ کدی ھم وتی چہ مکسد ءَ پد نہ کِنز اِت اَنت وڑ وڑیں بُھتام ءُ اِلزام (سرٹیفیکٹ) اِش سَگّ اِت، مروچی آیانی کِرد آیاناں کسّے ءِ دیم ءَ سر جَھلی ءَ نیل اِیت۔
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔