رشیدہ زھری ءُ آئی لوگواجہ ءِ یل نہ کنگ ءِ بگیری ءَ ترندیں زھرشانی کنگ بیت – وی بی ایم پی

پوج ءِ دست ءَ زھگ ءُ زالبولانی زورانسری آوار جنی ءِ کسہ ءَ دیر انت – ماما قدیر بلوچ

سندھ ءِ مزن شھر کراچی ءَ بیگواھیں مردمانی پانکجنیں گل وائس فار بلوچ مسنگ پرسنز ءِ زھرشانی برجاہ، زھرشانی بنجل ءَ چار ھزار ءُ نُھ سد ءُ چِل ءُ شش روچ سرجم بوتگ انت – مروچی چہ پنجگور ءَ سیاسی ءُ چاگردی باسک جمیل احمد بلوچ، راشد بلوچ، اللہ بخش بلوچ ءَ بنجل ءَ اتکگ ءُ بیگواھیں مردمانی کھول ءِ گوم ءَ دلپدردی درشان اِتگ –

بنجل ءَ اتکگیں مردمانی گوم ءَ تران کنان ءَ گل ءِ کمک سرکماش ماما قدیر بلوچ ءَ گوشتگ کہ ما چہ وزیر داخلہ رانا ثناء اللہ ءَ جست کنگ لوٹ ایں کہ آ گوستگیں سال ءَ شال ءَ بوتگیں بیگواھیں مردمانی کھول ءِ نندانک ءَ اتکگ ءُ کول ءِ کُتگے ءُ شُتگ گڈا کُج انت شمے رپورٹ، ؟ کجام درگت ءَ شما کار کُتگ مارا ھم بگوشے گوں –

ماما قدیر ءَ گوشتگ کہ ما منّ ایں کہ اے چیریں ادارھانی دیم ءَ بے وس انت – بیگواھیں بلوچ سیاسی باسک کہ زنداناں بندیگ انت ءُ ازیت سگگ انت اے پرچا زھمت نہ کش انت ءُ ترتابے ءَ نہ رو انت کہ اودا بلوچ سیاسی ورنا زھگ ءُ زالبول ءُ کماشانی گوم ءَ چی بوگ ءَ انت – ما اشانی بلوچستان ءِ ترءُ تاب ءَ تامری سین ءُ اکس بندی ءِ سرپد بہ ایں ھمے وڈ وھدیکہ بیگواھیں مردمانی کھولاں کمیشن کمیٹی لوٹارینیت گڈا درساں پیش ھمے جست ءَ کن انت کہ ثبوت بیار ات – ھزارانی ھساب ءَ سبوت آؤرتگ انت، تانر پیش داشتگ انت ھزاراں بیگواھیں بلوچانی زھرشانی ءُ رسانکدری درشان پیش کتگ انت – گوستگیں وزیر داخلہ آفتاب شیر پاؤ ءُ ھستیں وھدے وزیر داخلہ گپ ءُ وی بی ایم پی جوڈ کرتگیں لسٹ ءُ بلوچ رھشونانی زورانسری آوار جنی ءُ آھانی ژانگولیں جونانی دست کپگ ریکارڈ ءِ تہ ءَ ھست انت –

ماما قدیر بلوچ ءِ گوشگ ات اے گواہ شمے زمیر ءُ چمانی پچ کنگ ءَ پہ ھچ نہ انت – بلوچستان ایردستیں دمگے ادا میان استمانی کانودانی رِد ءَ بلوچانی سیاسی بندیگانی گوم جنگی بندیگانی وڈا کنگ بیت –

ماما قدیر بلوچ ءَ وتی دگہ تامری درشان ءِ تہ ءَ گوشتگ کہ بلوچستان ءِ تہ ءَ پاکستانی پوج ءِ دست ءَ زھگ ءُ زالبولانی آوار جنی ءِ کسہ نوک نہ انت اے دیریگیں کسھے، اے وھدءَ پوج ءَ بلوچستان ءِ جتا جتائیں ھند ءُ دمگاں سَے سد ءَ گیش زالبول ءُ یکسد ءُ ھپتاد زھگ آوار جتگ انت – چہ شال ءَ محمد رحیم زھری ءُ آئی ءِ لوگبانک ءِ زورانسری آوار جنی ھمیشی ءِ درچ انت –

ماما قدیر ءَ گوشتگ کہ یک سالیگیں زھگانء زورانسری آوار جنی پاکستانی استان ءِ بے سوبی ءَ پدر کنت – مارا پھر انت کہ مئے کسانسالیں زھگ پہ پاکستان ءِ ھاتر ءَ ھتری ءِ جوڈ بوتگ انت –

محمد رحیم ءُ آئی ءِ لوگبانک ءِ زورانسری آوار جنی ءِ درگت ءَ وائس فار بلوچ مسنگ پرسنز ءَ وتی شنگ کرتگیں درشان ءِ تہ ءَ گوشتگ کہ چہ شال ءَ زورانسری آوار جنگ بوتگیں زالبول رشیدہ زھری ءُ آئی لوگواجہ محمد رحیم زھری زوت یل کنگ بہ بنت –

گل ءَ گوشتگ کہ بلوچ زالبول رشیدہ ءُ محمد رحیم ءِ زورانسری آوار جنی ءِ درگت ءَ مروچی درسیں کانودی کار سرجم کنگ بنت اگاں پدا ھم رشیدہ ءُ آئی ءِ لوگواجہ ءَ دیما آرگ نہ بنت گڈا چہ گل ءِ نیمگ ءَ زھرشانی کنگ بیت –