نبشتانک: بلوچ راجدپتر ءُ جنرل مُشرپ
نبشتہ کار: پاتما بلوچ
دی بلوچستان پوسٹ
اگاں ما انیگیں بلوچ راجی آجوئی ءِ جُھد ءَ چمشانکے بدے ایں گُڑا ما سرپد بہ ایں کہ بلوچ راج ءِ سر ءَ اِے جنرل پرویز مُشْرَپ ءِ بُنگیج کُتگیں جنگ، یکشل ءَ برجاہ داشتگیں دُژمن ءِ زُلم ءُ زوراکیانی آسر اِنت کہ ٹَک ءُ دمگانی میان ءَ بھر ءُ بانگیں بلوچ راج ءِ دلیریں ورناہ پہ وتی راجی آجوئی ءِ راہ روان کُتگ اَنت۔ اگاں ما راجدپتر ءَ وان ایں گُڑا ما سرپد بہ ایں کہ مرچی مئے بلوچ راجی آجوئی ءِ جُھد ءَ سک باز دیمروی کُتگ پرچا کہ بلوچ راج مُدام وتی دمگاں وتگڑیں میر، سردار ءُ نوابانی گُلام بیتگ ءُ انگت ھم ھست، چہ ایشی ءَ بلوچ راج مُدام ناتپاکی، وتواہ ءُ بھر ءُ بانگ اِنت۔ گِند ئے ھمے میر، نواب ءُ سردار دُژمن ءِ کاسگ چٹ ءُ دلار اَنت پرچا کہ اِے نہ لوٹ اَنت کہ لس بلوچ راج یکمُشت ءُ ھمسنت بہ بیت ءُ پد ءَ اے بلاھیں راج آزات ءُ وتواجھیں بلوچستان، آزات ھیال ءُ راجمستری ئیں مُلکے ءِ واھُند بہ بیت پرچا کہ یک آزات ھیال ءُ راجمستری ئیں بلوچستان ءَ سرداری، میر ءُ نوابی روا نہ بیت۔ اگاں ما راجدپتر ءَ وان ایں گُڑا دْراھیں چیز بلور ءِ وڑ ءَ پدرا اَنت کہ اے کاسگ چٹیں میر ءُ سرداراں مُدام بلوچ راج ءِ دژمن ءَ پائدگ داتگ۔
وھدیکہ بلوچ راج ءِ دُژمن ءَ 28 مارچ 1948 ءَ بلوچستان ءِ سر ءَ اُرش کنت گُڑا چہ دُرستاں پیسر ھمے دمگی سردار، میر ءُ نواباں لب ءُ لالچ دیان ءَ بھا زُرت اَنت ئِے پمیشکا ما گِند ایں کہ 1948 ءَ شھزادگ ابدلکریم بلوچ ءِ سرکماشی ءَ اولی بلوچ راجی آجوئی ءِ سِلاھبندیں جُھد ءَ ھمے دمگی میر ءُ سرداراں بلوچ راجی گھگیری ءَ ناں وت بھر زورت ناں کہ وتی دمگی بلوچاں گْوشت اش کہ پہ وتی آجوئی ءَ پاد بیا اَنت ، پہ راجی آجوئی ءَ شھزادگ ابدلکریم ءِ کاروان ءَ ھوار بہ اِت۔ گِند ئے پہ دُژمن ءِ پائدگاں ھمے دمگی میر ءُ نواباں بلاھیں بلوچ راج بھر ءُ بانگ کنان ءَ چہ سرجمیں راجے ماں کسانیں ٹَکاں ونڈ ءُ چُنڈ کُتگ اَنت۔ نی بچار کہ کسے وت ءَ مینگل ءُ کسے وت ءَ رئیسانی ءُ بُلیدی گْوش ایت، کسے وت ءَ کھوسہ، لیگاری، کھتران، بُزدار، مری ءُ گیشکوری گُڑا کسے وت ءَ بُگٹی، لانگو ءُ رِند گْوش ایت کسے جمالی اِنت ءُ کسے مگسی۔
گِندئے اے سرجمیں راج پہ دُژمن ءِ سیت ءُ پائدگاں ماں دمگی راجدْروہ ءُ کاسگ چٹّانی دست ءَ بھر ءُ بانگ اَنت چمیشکا اے وت ءَ اول بلوچ نہ لیکھ اَنت اگاں ایشاں وت ءَ بلوچ منّ اتیں گُڑا اے دْراہ بلوچاں بابو نوروز ھان زھری ءِ سرکماشی ءَ 1958-59 ءِ بلوچ راجی جنگ ءَ ھوار بوتگ اِت اَنت! اگاں ھمے دمگی وتگڑیں سردار، میر ءُ نواباں کمیں گیرت، بلوچیت ءُ راجدوستی ءِ مارشتے بوتیں گُڑا ایشاں 1973-78 ءِ بلوچ راجی آجوئی ءِ سِلاھبندیں جُھد ءَ بابا ھیربکش ءُ اتا اُلہ مینگل بے کُمک ءُ بے ھمراہ نہ کُتگ اَت اَنت کہ ساھیوال ءُ چکوال ءِ پنجابی پوج بلوچ راج ءِ مری ءُ مینگل ٹک ءِ بلوچانی گِساں ماندارگ ءُ بلوچ راج ءِ ورناہ ءُ کماشاں کُشگ ءَ ات اَنت، اگاں ھمے نزیکیں لگوریں سردار ءُ میر وت جنگ ءِ بھر بُوگ ءَ تُرسگ ءَ اِت اَنت گُڑا باید اِنت وتی ٹَک ءِ بلوچاں بہ گْوشتین اش کہ برو اَنت ءُ بابا ھیر بکش مری ءِ سرکماشی ءَ بلوچ راجی آجوئی ءِ سِلاھبندیں جنگ ءَ ھوار بہ بنت۔ بلے اِنّاں پرچا کہ اے دْراہ پنجابی ءِ کاسگ چٹّ اِت اَنت، ایشاں پنجابی ءِ لب ءُ لالچ رسگ ءَ اَت گُڑا ایشاں چون بلوچ راجی آجوئی ءِ بھر بہ زُرتیں یا کہ وتی ٹَک ءِ بلوچاں بہ گْوشتین اش کہ راجی جنگ ءَ ھوار بَہ اِت۔ چوناھا 1971 ءَ پاکستان وت ھِندوستان ءُ بنگلادیش ءِ دست ءَ پْروشتگ اَت پمیشکا پہ راجی آجوئی ءَ بلوچ راج ءِ تپاکی ءُ یکمشتی لازمی اَت باید اِنت نزیکیں سلیمانی بلوچاں ھوار مکران ءُ رکشان ءِ بلوچاں نمیرانیں بابا ھیربکش مری 1973 ءِ جنگ ءَ بے کُمک مہ کُتیں بلے چے کن ئے او بات بلوچ تئی کِسمت ءَ-
ھمے وڑ ءَ داں روچ ءِ مرچیگ ءَ وتگڑیں دمگی میر ءُ سردار ءِ وڑیں کاسگ چٹّاں بلوچ راج بھر ءُ بانگ داشتگ اَنت بچار کہ یک پنجابی ءِ وڑیں درآمدگیں زورانسرے کہ آئی ءَ گوں بلوچ راج ءَ ھچ سْیادی ھم نیست۔ آئی ءِ زُبان، آئی ءِ دود ءُ ربیدگ گوں بلوچ ءَ جتا اَنت چون راج ءِ دمگ، میتگ، کوہ ءُ کوچگاں بلوچ راج ءِ تْرُندیں چیرجنگ ءَ داشت کنت وھدے کہ ھمے زورانسر بلوچ کوہ، دمگ ءُ میتگاں وت ناشناس اِنت؟ گِند ئے پہ وتی بْراتانی کُشائینگ ءَ ما بلوچ راج ءِ ھمے راجدْروہ وت پنجابی پوج ءِ رھشُونی ءَ کنان ءَ کوہ ءُ کوچگاں سر کنگ ءَ ایں، بلوچ میتگانی ماندارگ، راجی سرمچار ءُ رھشُونانی شھیدی، زالبولانی کم شرپی ءُ ورنایانی گار ءُ بیگواھی ءَ مئے راجدْروھانی دست مان چے ءَ کہ اے چکوال ءُ ساھیوال ءِ تینّو مینّواں مجال اِنت کہ سربازیں بلوچ سرمچارانی دیم ءَ اوشت اَنت اگاں روس، امریکہ ءُ نیٹو چیرجنگ ءِ ھرچگاں برداش کُت نہ کن اَنت گُڑا اے پنڈوکیں پنجابی چہ کُجا یک گْوریلہ جنگے برداش کنت۔
بژن اِنت کہ ما بلوچ ناتپاک ایں، وتگڑیں دمگی میر ءُ سردار پنجابی ءِ ٹوھیں آسراتی اَنت۔ البت ما وتی راج ءِ مستریں دُژمن جنرل مُشْرَپ ءِ منّتوار ایں کہ ھمے جھندمی ءِ زُلم ءُ ناھودگیں کَشت ءُ کوش ءِ آسر ءَ راجی جنگ بلوچ وانِندھانی دست ءَ شُت چریشی ءَ راجی آشوب چہ کوھلو ءُ ڈیرہ بُگٹی ءَ درکپتگ ءُ سرجمیں بلوچستان ءِ ھمُک کُنڈ ءَ سر بیتگ۔ مرچاں ڈیرہ گازی ھان، جیکب آباد ءَ بہ گِر تاں نمروز، زاھدان ءُ بندرآباس ءَ بلوچ راج آجوئی لوٹ ایت۔ کسے منّ ایت یا مہ منّ ایت بلے راستی وَ ایش اِنت کہ اے بلوچ راجی آجوئی جنگ ءِ آسر اِنت کہ مرچاں پاکستان یک ایکونومک اندوھے ءِ آماچ اِنت۔
نی باید انت بلوچ راجی لشکر ھمے داب ءَ مُدام راج ءِ لس وانِندگیں ورنایاں وتی سِلاھبندیں گلاں ھوار کنائینگ ءِ جُھد ءَ بہ کن اَنت کہ دمگی میر ءُ سرداراں ھوار راجدْروھاں پْروش دیگ بِہ بیت وھدے کہ ھمے دمگی میر ءُ سرداراں پْروش بیتگ گُڑا دُژمن ءَ ھم الم پْروش بیت، راج وتی ڈیھ ءِ وتواجہ بیت ءُ آزات ءُ راجمستریں آجوئی بلوچستان ھم دیمروی کنت۔
بلوچ شالا یکمُشت ءُ وت ماں وت ھمکوپگ بات، بلوچستان شالا آجوئی بہ بات۔
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔