روکپتی بلوچستان: تیل کشیں گاڑیانی چَپ بوگ ءَ کم چہ کم شش تیل کش بیران

روکپتی بلوچستان ءَ ایرانی لشکر ءَ تیل کشین گاڑیانی سر ءَ تیرگواری کرتگ چریشی ءَ کم چہ کم یکیں جاہ ءَ پنچ مردم بیران ءُ دگہ یک گاڑی ءِ چَپ بوگ ءَ یک مردمے بیران بیتگ-

روکپتی بلوچستان ءِ دمگ ایرانشھر ءَ گوستگیں روچ ءَ ایرانی لشکر ءَ یک تیل کشیں گاڑی ءِ سر ءَ تیرگواری کرتگ ءُ چریشی ءَ گاڑی ڈرائیور ءِ دست ءَ لگوشتگ ءُ دگہ گاڑی ءَ گوں ٹکرے وارتگ-

ھالانی رد ءَ ایرانشھر ءَ ایرانی لشکر ءَ تیل کشیں گاڑی ءِ سر ءَ تیرگواری کرتگ ءُ چریشی ءَ گاڑی ءَ دگہ گاڑی ءَ گوں ٹکر وارتگ ءُ چرے آسر ءَ پنچ مردم بیران بیتگ اَنت-

وئیل ءِ بوگ ءَ پد گاڑیاں آس کپتگ ءُ گاڑیاں آس کپتگ ءُ گاڑیاں سواریں مردم ستکگ ءُ بیران بیتگ اَنت-

ھالانی تہ ءَ گوشگ بیتگ کہ گاڑیانی آس کپگ ءَ پد مردماں آس کُشیں گاڑی ءَ را رھوت کتگ بلے آئی ءَ آیگ ءِ بھانگ کتگ ءُ نیتکگ – اے پنچین بیران بیتگیں مردمانی پجار داں انگت ءَ نہ بیتگ اَنت-

ھمے وڑ ءَ ھاش ءَ دیم پہ سراوان ءَ روکیں تیل کشیں گاڑی ھم وئیل ءِ آماچ بیتگ ءُ کپتگ-

اھوالانی تہ ءَ گوشگ بیتگ کہ سراوان ءَ روکیں تیل کچیں گاڑی کپتگ ءُ چریشی ءَ چہ زاھدان شیر آباد ءِ جھمنندیں امان اللہ براھوئی بیران بیتگ-

زانگ بہ بیت اے سال ءِ بندات ءَ داں انیگ ءَ شانزدہ تیل کشیں مردم بیران بیتگ اَنت ایشانی توک ءَ گیشتر ایرانی لشکر ءِ تیرگواریانی آسر ءَ وئیل ءِ آماچ بیتگ اَنت-