چُک ءُ زامات انگت پاکستانی پوج ءَ گون انت – رشیدہ زھری ءِ مات

چہ شال ءَ زورانسری آوار جنگ بوتگیں کھول ءِ وارساں سَے شمبے ءِ روچ ءَ وتی دوستیگیں مردمانی زورانسری آوار جنی ءِ درسیں ھال وائس فار بلوچ مسنگ پرسنز ءِ گور ءَ جما کُتگ انت –

بلوچستان ءَ بیگواھیں مردمانی پانکجنین گل وائس فار بلوچ مسنگ پرسنز ءِ گور ءَ ھزدار ءِ دمگ زھری ءِ جھمنند ءَ گوشگ ات کہ گوستگیں روچ ء پاکستانی پوج مزنیں کچے ءَ شال گیشکوری ٹاؤن ءَ منی زامات ءِ محمد رحیم ءِ گِس ءَ بیڑ برتگ ءُ منی زھگ رشیدہ زامات محمد رحیم دو کسانیں زھگ ءُ محمد رحیم ءِ مات زورانسری آوار جتگ ءُ بیگواہ کتگ انت –

زالبول ءِ رِد ءَ منی زامات ءُ چُک پاکستانی پوج ءِ گون انت، وھدیکہ گوستگیں شپ ءَ محمد رحیم زھری مات ءُ آئی ءِ دو کسانیں نماسگ یل داتگ انت –

اے درگت ءَ گل ءِ زمہ داراں گوں تران کنان ءَ گوشگ ات کہ منی چُک ءُ زامات انگت دیم ءَ آرگ نہ بوتگ ءُ آھاں اے ھم گوشگ نہ بوتگ کہ کجام جُرم ءَ زھگ ءُ زالبول بیگواہ کتگ انت ءُ اے وھدی کجا بندیگ انت –

زانگ بہ بیت گوست ءَ ھم بلوچستان ءَ اے وڈیں وئیل بوتگ انت کہ زھگ ءُ زالبول زورانسری آوار جنگ بوتگ انت –

چہ شال ءَ زورانسری آوار جنگ بوتگیں مردمانی تہ ءَ محمد رحیم زھری ء چاکر خان زھری، آئی ءِ جنکو دعا زھری ءُ چار سالی بچک یحییٰ زھری، لوگبانک رشیدہ زھری ءُ مات بس حاتون ھوار انت –

محمد رحیم ءُ لوگبانک ، مات ءُ دو زھگاں سَے فروری ءَ چہ شال گیشکوری ٹاؤن ناشناس ءَ پٹ پولی آپریشن ءَ آوار جتگ ءُ بیگواہ کتگ انت کہ چہ آئی ءَ پدمحمد رحیم ءِ مات ءُ زھگ گوستگیں شپ ءَ یل بوتگ انت بلے جند ءُ لوگبانک ھنگت بیگواہ انت آھانی ھچ ھال اھوال نیست –