کراچی: زورانسری آوار جنگ بوتگیں سلطان سعید ءِ گِس ءِ سر ءَ رینجرز ءَ بیڑ برتگ

پوج ءَ بیگواھیں ورنایے گِس ءِ سر ءَ بیڑ برتگ ءُ زوراکی کنان ءَ کھول ءِ مردم جتگ انت ءُ موبائیل پچ گپتگ انت –

ھالانی رِد ءَ گوستگیں روچ ءَ لیاری ءِ دمگ گل محمدی لین ءَ رینجرز ءُ چیریں ادارھانی کارمنداں زورانسری آوار جنگ بوتگیں بلوچستان بالیچہ ءِ جھمنند سلطان سعید ءِ گِس ءَ بیڑ برتگ زوراکی کنان ءَ زالبول جتگ انت ءُ چہ آھاں موبائیل پچ گپتگ انت –

اے درگت ءَ گیشیں سرپدی دیان ءَ بیگواھیں سلطان سعید بلوچ ءِ گھار عدلہ سعید ءَ گوشتگ کہ رینجرز ءُ چیریں ادارھاں بید پٹ پولی وارنٹ ءَ کراچی ءَ مئے گِس ءَ بیڑ برتگ ءُ گِس ءِ تہ ءَ درسیں مردمانی موبائیل پچ گپتگ انت، گِس ءِ الماری پُروشتگ انت ءُ کھول ءِ مردم جتگ انت –

آئی گوشتگ کہ پاکستانی پوج ءَ اے میان ءَ پُروشت پروش کتگ مارا جتگ ءُ جست کتگ کہ سلاہ کجا چیر داتگ انت –

عدلہ سعید ءِ رِد ءَ دو سال ساری پاکستانی پوج ءَ منی برات سلطان سعید وتگڑیں آپریشن ءَ آوار جتگ ءُ بیگواہ کتگ کہ ھنگت بیگواہ انت –

آئی ءَ گوشتگ کہ دگہ دابیں مھلوک ءِ چادر ءُ چاردیوالی لگتمال کن انت ءُ مئے دوستگیں مردماں آوار جن انت ءُ بیگواہ کن انت وھدیکہ ما وتی دوستیگیں مردمانی ھاتر ءَ توار چست کن ایں گڈا اے مارا گناھگار گُش انت ءُ مئے سر ءَ زوراکی کن انت –

بیگواھیں سلطان سعید ءِ گھار ءَ لوٹ کتگ گوشتگ کہ اگاں اے ملک ءَ انساپ ءِ ادارہ ھست انت گڈا مارا انساپ دیگ بہ بیت ءُ اے ریاستی گنڈی دارگ بہ بنت –

زانگ بہ بیت بیگواھیں مردمانی کھول ءِ سر ءَ کراچی رینجرز ءِ اے اولی رند نہ انت اشی ءَ چیزے روچ ساری چیریں ادارھانی کارمندان کراچی سنٹرل جیل ءِ دیم ءَ ھزدار ءِ جھمنند عبدالحفیظ آوار جنگ ءِ کوشست کتگ ءُ آئی کھول لٹ شاپ کتگ زدگ کتگ انت –

اشی ءَ ساری ءَ گوستگیں سال دوھزار بیست ءُ دو ءَ رینجرز ءُ پاکستان ءِ چیریں ادارھان کراچی نیول کالونی ءَ بلوچ سیاسی باسک راشد حسین بلوچ ءِ گِس ءَ بیڑ برتگ مات ءُ گھار لٹ شاپ کتگ انت ءُ کھول ءِ ایندگہ مردم آوار جتگ انت –

گوستگیں روچاں چہ کراچی ءَ حفیظ بلوچ ءِ دوبر زورانسری آوار جنی ءِ تامر ھم شنگ بوتگ ات کہ چریشی ءَ پد راجکاریں گل ءُ انسانی ھکانی ادارھاں سندھ ءِ سرکار ءَ لوٹ کتگ کہ گامگیج بہ زور انت –