تگران ءُ مند ءَ پوج ءِ سر ءَ اُرش، بلوچ سلاہ بندیں گلاں ارشانی زمّہ واری منّ اِتگ انت

سربوتگیں ھالانی رِد ءَ گوستگیں روچ ءَ ناشناسیں سلاہ بندیں مردماں زامران ءِ دمگ تگران ءُ مند ءِ دمگ مھیر ءَ پاکستانی پوج ءِ سر ءَ اُرش کُتگ ـ

اھوالکار ءِ رِد ءَ زامران ءَ پاکستانی پوج ءِ سر ءَ بوتگیں اُرش تگران کلگ ءَ پوجی پانگِس ءِ سر ءَ کنگ بوتگ ءُ مند ءِ اُرش مھیر ءِ بنگلہ پانگس ءِ سر کنگ بوتگ، ھردو اُرشاں پاکستانی پوج ءَ جانی ءُ مالی تاوان ءِ دیمپانی کنگ کپتگ اُرشانی زمّہ واری بلوچ آجوئی لوٹوکیں سلاہ بندیں گل بلوچستان لبریشن فرنٹ ءُ بلوچ لبریشن آرمی ءَ منّ اِتگ انت –

بی ایل ایف ءِ جارکش میجر گوھرام بلوچ ءَ وتی افیشل ٹیلگرام چینل آشوب ءَ شنگ کرتگیں درشان ءِ تہ ءَ گوشتگ سرمچاراں پنچ فروری ءِ شپ ءِ ادار ھپت ءَ مند ءِ دمگ مھیر ءَ بنگلہ ءِ پانگس ءَ سر ءَ راکٹ گولہ آس داتگ

جارکش ءِ رِد ءَ سرمچاراں دہ راکٹ گولہ آس داتگ کہ آ پانگس ءِ تہ ءَ کپتگ اَنت – اُرش ءَ زورگیریں پوج ءَ مزنیں کچے ءَ جانی ءُ مالی تاوان بوتگ – مرتگین ءُ ٹپی بیتگیں کارمندانی برگ ءَ پہ ایمبولینس اُرش جاہ ءَ سر بیتگ اَنت –

میجرءَ گوشتگ کہ ترندیں اُرش ءَ پد پروش وارتگیں لشکر ءَ لس مھلوک سر ءَ بیڑ برتگ ءُ مردم لٹ شاپ کرتگ اَنت-

تگران ءَ پاکستانی پوج ءِ سر ءَ بوتگیں اُرش ءِ زمّہ واری بلوچ لبریشن آرمی ءَ منّ اِتگ – بی ایل اے ءِ جارکش جئیند بلوچ ءَ وتی ٹیلگرام چینل ھکل ءَ شنگ کرتگیں درشان ءِ تہ گوشتگ کہ سرمچاراں پنچ فروری ءِ شپ ءَ زامران ءِ ھند تگران، کلگ ءَ زورگریں پاکستانی پوج ءِ بُنجل ءِ سر ءَ گوں راکٹ ءُ دگہ ٹوھیں سلاھاں اُرش کُرتگ –

جیئند بلوچ ءِ رِد ءَ اُرش ءَ دُژمنیں پوج ءِ سَے کارمند زدگ بوتگ انت ءُ بُنجل ءَ باز تاوان رستگ – آئی ءَ گوشتگ کہ سرمچارانی دست ءَ پروش ورگ ءَ پد دُژمنیں پوج ءَ ھندی مردم زوراکی ءِ نشانگ کُرتگ اَنت –

جارکش ءَ گوشتگ کہ بلوچستان ءِ آجوئی ءَ پاکستانی پوج ءِ سر ءَ مئے اُرش برجاہ مان انت –