مزنیں کچے ءَ بی ایل اے ءِ سرمچار کاھان ءِ بازار ءَ اتکگ انت ءُ ترءُ گرد کنگ ءَ انت

سربوتگیں ھالانی رِد ءَ بلوچستان ءِ دمگ کوھلو کاھان ءَ مزنیں کچے ءَ بلوچ لبریشن آرمی ءِ سرمچار اتکگ انت وھدیکہ بازیں جاھاں سلاہ بندیں مردم تر ءُ تاب کنگ ءَ انت – 

دمگی اھوالکار ءَ گوں ٹی بی پی ءَ تران کنان ءَ گوشتگ کہ بازیں جاھے ءَ بلوچ سلاہ بندیں مردم گندگ بوگ ءَ انت کہ دمگی مردمانی گوم ءَ دچار کپگ ءَ انت ءُ گون آھاں ھال اھوال کنگ ءَ انت وھدیکہ بنجاھی شھدگانی سر ءَ سلاہ بندیں ترءُتاب ھم برجاہ انت – 

اھوالکار ءِ گوشگ انت کہ سلاہ بندیں مردمانی سیادی بلوچ آجوئی لوٹوکیں سلاہ بندیں گل بلوچ لبریشن آرمی انت کہ آیانی آیگ دو روچ ساری بندات بوتگ –

اھوالکار ءَ گوں ٹی بی پی ءَ دیمتر ءَ گوشتگ کہ اے مردم بازار ءُ بنجاھی دگاں ھوار شھید بالاچ مری ءِ کلات،  نواب مھراللہ خان ءِ کلات ءُ پوجی پانگس ءُ دگہ جاھاں ساڈی انت –

بلے تنی وھدی بلوچ لبریشن آرمی ءِ جارکش جیئند بلوچ ءَ اے درگت ءَ ھچ وڈیں درشان نہ داتگ – 

زانگ بہ بیت کاھان ءَ بلوچ آجوئی لوٹوکیں سلاہ بندیں گلاں باز براں پاکستانی پوج ءِ سر ءَ اُرش کُت – پوج ءِ سر ءَ ٹوھیں اُرش ءِ گوستگیں سال ءِ گڈی ءَ کنگ بوتگ کہ اودا پاکستانی پوج ءِ کپٹن ءِ ھوار ھشت کارمند مرتگ انت ءُ اُرش ءِ زمّہ واری بلوچ لبریشن آرمی ءَ منّ اِتگ بوتگ – 

ھمے وڈ فروری سال دوھزار بیست ءُ یک ءَ کاھان ءَ پاکستانی پوج ءِ ھشتاد ءُ چارمی ونگ ءِ جامک ءُ کوٹڑی بنجل بلوچ لبریشن آرمی ءِ سرمچاراں  ٹوھیں اُرشے ءَ ھپت کارمند کُشتگ انت ءُ بنجل دستیگ کتگ بوتگ –