سربوتگیں ھالانی رِد ءَ گوستگیں سال ءِ دسمبر ءِ ماہ ءَ پاکستانی پوج ءِ دست ءَ زورانسری آوار جنگ بوتگیں ورنا نادل حسین ء مبارک مرچی یل بوتگ ءُ وتی گِس ءَ سربوتگ –
نادل حسین گوستگیں سال ءَ بیست نُھ دسمبر ءِ شپ ءِ ادار یانزدہ ءَ چہ کیچ ءِ بنجاھی شھر تربت ءَ پاکستانی پوج ءَ آوار جتگ ءُ بیگواہ کتگ بوتگ – آئی ءِ یل بوگ ءِ ھبر آئی ءِ مستریں برات ءَ راست کُتگ ءُ گوشتگ کہ ما کلیں مردمانی منت واریں کہ آھاں منی برات ءِ ھاتر ءَ توار چست گوں ما ھمراھداری کُتگ –
زانگ بہ بیت بلوچستان ءِ جتا جتائیں ھند ءُ دمگاں مزنیں کچے ءَ مردم آوار جنگ ءُ بیگواہ کنگ بوتگ انت کہ آھانی تہ ءَ کمے کساس ءَ مردم یل کنگ بوتگ انت بلے دومی نیمگ ءَ دوسری آوار جنگ بیگواہ کنگ بوگ ءَ انت – آوار جنگ بوتگیں مردمانی گیشتریں کچ بلوچ نودربر ورنایانی انت –