وائس فار بلوچ مسنگ پرسنز ءِ سروکی ءَ زورانسری بیگواھیانی بگیری ءَ کراچی ءَ برجاھیں شدھڑتالی بنجل ءَ 4938 روچ سرجم بیتگ اَنت،کراچی ءَ چہ بیگواھیں عبدالحمید زہری ءِ چُک ءَ بھر زُرتگ وھدیکہ پشتون تحفظ مومنٹ کراچی ءِ کور کمیٹی ءِ رھشون ہدایت پشتین، ملکاورنگزیب، قسمت پشتین ءَ بنجل ءَ اتکگ ءُ کھولاں گوں یکجاھی درشان اِتگ۔
بنجل ءَ اتکگیں پشتون باسکاں گوں تران کنان ءَ وائس فار بلوچ مسنگ پرسنز ءِ وائس چیئرمین ماما قدیر بلوچ ءَ گُشتگ کہ بلوچستان ءِ تہءَ قوضہگیریں پاکستانی ادارگانی ناشرکایں گامگیج ترندی ءَ گوں برجاہ اَنت بلوچ آبادیانی سرءَ پر بمب گواری ءُ زورانسری بیگواہ کنگ ءَ پد مھلوک ءَشھید کنگ ءَ اَنت۔ سوئی، ڈیرہ بگٹی، مکران، آواران، مشکے، مستونگ ءُ بولان ءِ تہءَ پاکستانی پوجءَ آبادیانی نشانگ کنگ ءُ بلوچ نسل کشی ءِتہءَ ترندی آورتگ۔
ماما قدیر ءِ ردءَ ھمے ماہءَ بلوچستان ءِ جتاھیں دمگاں چہ پاکستانی لشکریاں 22 بلوچ لٹ کُٹ کنگ ءَ پد گوں وت بُرتگ اَنت کہ داں انگت چیریںادارگانی بندیگ جاھاں بندیگ کہ اِشانی زند ءِ درگتءَ مارءَ تُرس اِنت پاکستانی پوج بلوچستان ءِ تہءَ زوراکی ءِ نوکیں ریکارڈ اڈ کنگ ءَ اِنت ءُ وتیقوضہ ءَ مھکم کنگ ءِ ھاترءَ ھمک روچی ردءَ ناشرکاریں گامگیج زیرگ ءَ اِنت آئی ءَ جھانی سامراجی تاگتانی مستری، کمک ءُ ھمکاری گون اِنت۔
اے درگتءَ زھرشانی ءَ ھواریں کراچی ءَ چہ دزگیری ءَ پد بیگواہ بیتگیں عبدالحمید زہری ءِ جِنِک سعیدہ حمید ءِ گُشگ اَت کہ آ گوستگیں بیست ءُماھاں چہ وتی پِت ءِ یل کنائنگ ءِ ھاترءَ زھرشانی کنگ ءَ اِنت۔ بلے اے نیام ءَ کسی ءَ ھم توار گوش نہ داشتگ پِت ءِ زورانسری بیگواھی ءَ دو سالسرجم بیگی اِنت بلے آ داں انگت دیما آرگ بیگ ءَ نہ اِنت۔
سعیدہ حمید ءِ گُشگ اَت کہ انساپ دیگ ءِ ٹاہ دیوکیں آمیدگس ءُ کمیشناں منی دزبندی ءُ زھرشانی دوھیں ڈالچار کُتگ اَنت مئے لوٹ اِنت کہ پِت آمیدگس ءَ آرگ انساپ دیگ بہ بیت ءُ انسانی اگبالانی ادارگ منی پِت ءِ یل کنائنگ ءِ وتی کرد ءَ پیلو بہ کن اَنت۔