بلوچستان ءِ دمگ پنجگور ءِ ھنکین پروم ءَ ناشناسیں سلاہ بندیں مردمانی تیرگواری ءَ چہ تیل ءِ باپار ءَ بندوکیں دو مردم سک ٹپی بیتگ اَنت۔
اھوالانی ردءَ ایرانی اڈ کُتگیں دوہزار گاڑی جیرک سیمسرءَ چہ ایرانی تیل لڈگ ءُ پنجگور شھر ءِ نیمگ ءَ آیگ ءَ بیتگ کہ ناشناسیں سلاہ بنداں سلاہ ءِ زورءَ آیاں دارگ ءِ جھد کُتگ ءُ نہ اوشتگ ءِ سرءَ آیاں گاڑی ءِ سرءَ تیر گواری کُتگ کہ اِشی آسر ءَ گاڑی ءَ سورایں جاسم ء نعمت ءُ شاھد ء صادق جھممند شاہوکہن پنجگور ٹپی بیتگ اَنت۔
ٹپی بیتگیں مردم ٹیچنگ نادراھجاہ پنجگور ءَ برگ بیتگ اَنت۔
زانگ بہ بیت کہ پروم ءُ کَش ءُ کِری دمگانی تہءَ تیل ءُ دگہ باپاری مردماں گوں لُٹ ءُ پُلانی وئیل دیما پیداک اَنت۔
یات بہ بیت کہ مروچی تیل ءِ باپار ءَ بندوکیں یک مردمے ایرانی لشکریانی تیرگواری ءَ چہ بیران بیتگ اَت، کہ آ رودراتکی بلوچستان ءَ بلیدہ ءِ جھمنند بیتگ۔