پاکستان ءِ پرگینگ خیبرپپختونخواہ ءِ ھند کوہاٹ تانڈہ ڈیم ءَ لانچ ءِ بُڈَگ ءِ وئیل ءَ دگہ 14 نودربرانی جون دزکپتگ اَنت کہ چریشی ءَ پد اے وئیل ءَ بیران بیتگینانی کساس 44 ءَ سربیتگ۔
یک شمبے ءِ روچ ءَ کوہاٹ ءِ تانڈہ ڈیم ءَ سیل ءِ نیام ءَ لانچ ءِ بُڈَگ ءِ وئیل ءَ لانچ ءَ سواریں مدرسہ ءِ بیگواھیں نودربرانی درگیجگ ءِ کار سئے شمبے ءِ روچ ءَ ھم برجاہ اِنت ءُ مروچی دگہ 14 نودربرانی جون درگیجگ ءُ نادراھجاہ ءَ سر کنگ بیتگ اَنت کہ چرایشاں پد اے وئیل ءَ بیران بیتگیں نودربرانی کساس 44 بیتگ۔
چریشی ءَ پیسر یک شمبے ءِ روچ ءَ 11 وھدیکہ گوستگیں روچ ءَ 19 چُکانی لعش درگیجگ بیتگ اِت اَنت۔ گوستگیں روچ ءَ تاروکی ءِ سوب ءَ پَٹ ءُ پولی نیم بندگ یل کنگ کپتگ اَت کہ آ مروچی سھب ءَ پدءَ بندات کنگ بیتگ اَت۔
ڈپٹی کمشنر کوہاٹ فرقان اشرف ءَ رسانکدر ءَ گوں گپ کنان ءَ گُشتگ کہ یک شمبے ءِ روچ ءَ پہ سیل ءُ سواد ءَ رؤگ ءِ زھگانی لانچ تانڈہ ڈیم ءَ بُڈ اِتگ۔ لانچ ءَ 40 ءَ چہ گیش مردم سوار بیتگ کہ چریشی سوب ءَ آ چپ بیتگ ءُ بُڈ اِتگ۔ اے وئیل ءِ تہءَ مدرسہ ءِ معلم، جانشو ءَ ھوار دگہ لھتیں زھگانی پَٹ ءُ پول برجاہ اِنت۔ وھدیکہ 6 زھگ رکینگ بیتگ اَنت۔
دومی نیمگ ءَ تاندہ ڈیم ءِ لانچ وئیل ءِ بیران بیتگیں 20 نودربرانی نماز جنازہ وانینگ بیتگ۔ نماز جنازہ ءَ مدرسہ ءِ نودربر، اُستاد، سیاد و وارث ءُ واکداریں اپسراں بھر زُرتگ۔
یات بہ بیت کہ پشاور ءِ وتکُشیں تراک ءُ لانچ ءِ بُڈَگ ءِ ہیل ءِ سرءَ مروچی پاکستان ءِ پرگینگ خیبرپختونخوا ءَ سرکاری ردءَ “یوم سوگ” دارگ بیگ ءَ اِنت۔