بلوچستان ءِ بنجاھی شھر شال ءَ پاکستانی لشکریانی سرءَ دز بمب ءُ ڈھاڈر ءَ پاکستانی پوج ءِ بنجل ءِ سرءَ اُرش کنگ بیتگ
سر بیتگیں ھالانی ردءَ بلوچستان ءِ بنجاھی شھر شال ءَ پاکستانی لشکری دزبمب اُرش ءَ نشانگ کنگ بیتگ اَنت۔
اھوالانی ردءَ بلوچستان ءِ مزن شھر شال ءِ ھنکین ھزار گنجی ءَ ناشناسیں مردماں پاکستانی لشکری فرنٹیئر کور ءِ یک بنجل ءِ سرءَ دستی بمب اُرش ءِ کُتگ ءُ تتکگ اَنت۔
پولیس ءَ وئیل ءِ ھال راست کُتگ وھدیکہ جانی تاوان ءِ درگت ءَ اھوال دیگ نہ بیتگ۔
اُرش ءَ پد لشکریاں ھنکین انگیر کُتگ ءُ ارشکارانی پَٹ ءُ پول بندات کُتگ۔ وھدیکہ اُرش ءِ زمہ واری داں انگت ھچ گل ءَ نہ زُرتگ۔
دومی نیمگ ءَ دو شمبے ءِ شپ ءَ بلوچستان ءِ دمگ ڈھاڈر ءَ پاکستانی لشکریانی یک بنجل ءِ سرءَ سلاہ بندیں مردماں اُرش کُتگ۔
اُرش قلم دین ءِ ھند ءَ بستگیں پاکستانی لشکریانی یک بنجل ءِ سرءَ کنگ بیتگ۔
ھندی اھوالانی ردءَ ھنکین ءَ تراک ءُ تیرگواری ترندیں توار اِش کنگ بیتگ اَنت وھدیکہ اُرش ءَ پد لشکریاں نزیکی دمگانی انگیر کنان ءَ بنجاھی شھدگانی سرءَ پَٹ ءُ پول برجاہ اِنت۔
پوجی واکدارانی ردءَ اُرشانی تہءَ جانی تاوانانی درگتءَ ھچ پئیمیں لیکہ دیما نئیتکگ اَنت۔
وھدیکہ ڈھاڈر ءُ شال ءَ بیتگیں مروچیگیں اُرشانی زمہ واری ھچ سلاہ بندیں گل ءَ نہ من اِتگ۔