بلوچ راج ءَ یکجاہ بوگ ءُ زورانسری آوار جنیانی بگیری ءَ توار چست کنگی انت – ماما

سندھ ءِ مزن شھر کراچی ءَ بیگواھیں مردمانی پانکجنیں گل وائس فار بلوچ مسنگ پرسنز ءِ زھرشانی برجاہ، پریس کلب ءِ دیم ءَ برجاھیں زھرشانی بنجل ءَ مروچی چار ھزار ءُ نُھ سد ءُ سِی ءُ ھپت روچ سرجم بوتگ انت –

مروچی سندھ سجاگی فورم ءِ رھشون سارنگ جویو ءُ آئی ءِ سنگت، بلوچ یکجھتی کمیٹی کراچی ءِ ڈپٹی آرگنائزر عبدالوھاب بلوچ ءُ دگہ مردماں بنجل ءَ اتکگ ءُ بیگواھیں مردمانی کھول ءِ گوم ءَ دلپدردی درشان اِتگ –

گل ءِ کمک سرکماش ماما قدیر بلوچ ءَ ھمے وھد ءَ گوشتگ کہ بلوچستان ءَ برجاھیں انسانی ھکانی لگتمالی، ھمک روچ بلوچ ورنایانی زورانسری آوارجنی، ژانگولیں جونانی چگل دیگ ءُ سرجمیں بلوچستان ءَ پوجی لشکر کشی برجاہ انت –

آئی ءَ گوشتگ کہ اقوام متحدہ، ایمنسٹی انٹرنیشنل ءُ انسانی ھکانی دومی گلانی ھچ نگوشگ ریاستی زوراکیاں گیش کنگ ءَ انت –

آئی ءَ گوشتگ کہ ما اے ھم زان ایں کہ ھرتال، روانک، پریس کانفرنس ءَ چہ پاکستان ءِ ریاست مئے لوٹانی منگ ءَ تیار نہ بیت، بلے بلوچ چکچینی ءِ برجاہ بوگ ءَ ءُ دست ءَ ماں دست ءِ سر ءَ ایرکنگ ءُ نندگ ھم نبیت، بلوچ راج وتی بیگواھیں مردمانی یل بوگ ءَ لوٹیت –

ماما قدیر ءَ گوشتگ کہ اے دراجکشیں زھرشانی بنجل ءِ برجاہ دارگ بیگواھیں مردمانی یل کنائینگے ھاتر ءَ انت، بازیں بیگواھیں مردمانی کھول ادا کائنت ءُ وتی زھرشانی ءَ نبشتہ کنائین انت – آئی ءَ گوشتگ کہ بلوچ راج ءَ یکجاہ بوگ ءُ زورانسری آوار جنیانی بگیری ءَ توار چست کنگی انت –