بلوچستان ءِ دمگ کیچ ءُ گوادر ءَ دو جتاجتائیں وئیلانی آسر ءَ زالبولے ءَ ھوار سے مردم بیران بیتگ اَنت-
سربوتگیں ھالانی رِد ءَ بلوچستان ءِ دمگ کیچ ءِ تھسیل بلیدہ ءَ وھد سر ءَ الاج نہ بوگ ءَ لاپ پُریں زالبولے بیران بیتگ-
دی بلوچستان پوسٹ نیوز پتر ءِ رستگیں ھالانی رِد ءَ کیچ ءِ تھسیل بلیدہ ءِ دمگ میناز ءَ سیادی داروکیں زالبول ءَ چلگی ءِ میان ءَ وھد سر ءَ الاج نہ رسگ ءَ بیران بیتگ-
ھالانی رِد ءَ بلیدہ ءَ ڈاکٹر ءُ الاجی آسراتی نہ بوگ ءِ سوب ءَ زالبول ءَ را گوستگیں شپ ءَ تربت ءَ آرگ ءَ بیتگ اَنت کہ نا وشیں راھاں ساہ ئِے داتگ-
زانگ بہ بیت اشی ءَ ساری ھم چہ بلیدہ ءَ سیادی داروکیں یک زالبولے ءَ وھد سر ءَ آسراتی ءِ نہ رسگ ءَ چلگی ءِ وھد ءَ بیران بیتگ-
ھمے وڑ بلوچستان ءِ تیاب دپی شھر گوادر ءِ ھند سربُندن ءِ نزیک ءَ مکران کوسٹل ھائی وے ءِ سر ءَ یک گاڑی یے چپ بیتگ ءُ چریشی ءِ آسر ءَ دو مردم بیران بیتگ-
بیران بیتگیں مردمانی پجّار اسماعیل ءُ جاوید نام ءَ چہ بیتگ اَنت-
زانگ بہ بیت بلوچستان ءَ ھمکروچ دگ وئیل ءِ آسر ءَ بازیں مردمے ٹپی ءُ بازین ئِے بیران بیت –