مند: شیراز ءَ پاکستانی پوج ءِ سر ءَ بوتگیں ارش ءِ زمّہ واری بی ایل ایف ءَ منّ اِتگ

بلوچ آجوئی لوٹوکیں سلاہ بندیں گل بلوچستان لبریشن فرنٹ ءِ جارکش میجر گوھرام بلوچ ءَ وتی آفیشل ٹیلی گرام چینل “آشوب” ءَ مند ءِ دمگ شیزار ءَ بوتگیں اُرش ءِ زمّہ واری منّ اِتگ ءُ گوشتگ کہ اُرش ءَ نُھ پوجی کارمند کُشتگ انت –

میجر گوھرام بلوچ ءِ رِد ءَ سرمچاراں مروچی روچ ءِ ادار دوازدہ ءَ مند ءِ دمگ شیراز چُکاپ ءَ پاکستانی پوج ءِ کاروان ءِ راہ بستگ ءُ مزنیں سلاھاں گوں اُرش کُتگ –

جارکش ءِ رِد ءَ سرمچاراں یک گاڑی ءِ سر ءَ چہ نزیک ءَ ھما وھد ءَ اُرش کُتگ کہ پُشت ءَ دو گاڑی کمو دور ءَ آھستہ آھستہ پیداک بوتگ انت – اُرش ءَ گاڑی ءَ سواریں دھ پوجی کارمندانی تہ ءَنُھ ھما دمان ءَ مُرتگ انت وھدیکہ ڈرائیور زدگی جاوراں چہ گاڑی ءَ دور کُتگ گمان کنگ بیت کہ آ ھم مُرتگ – جنگ جاہ ءَ کمے دور پاکستانی پوج ءِ پانگس ءُ بنجل ھم ھست انت کہ چہ ھمودا آھاں سک باز تیرگواری ھم کُتگ ءُ مئے سرمچاراں پُشت ءِ دو گاڑیاں سواریں دژمن پوجی کارمندانی سر ءَ ھم اُرش کُتگ – دژمن ءِ سر ءَ ٹوھیں اُرش پد سرمچار جونیں جنگی رپک ءُ ھنرانی رِد ءَ چہ جنگجاہ ءَ سوبمندی ءَ گوں در اتکگ انت –

میجر ءِ رِد ءَ اُرش ءَ پد ھما دمان ءَ زورگیریں پوج ءِ جنگی بالگرداں شیلنگ کنان ءَ وت ءَ جنگجاہ ءَ سر کُتگ –

آئی ءَ دیمتر ءَ گوشتگ کہ زورگیریں استان تنی وھدی بلوچستان ءِ جغرافیہ ءَ سرپد نہ انت مروچیگیں اُرش ایردستیں بلوچستان ءِ دمگ مند ءَ بوتگ ءُ پاکستانی پوج آئی ءَ پنجگور گوشگ انت – ھمے وڈ گوستگیں وھد ءَ اورماڑہ ءَ زورگیریں پوج ءِ سر ءَ بوتگیں اُرش ایرانی سیمسر گوشتگ، یک جاھلیں پوج ءِ بے زانتی چہ پدر بیت اِنت کہ آ بلوچستان ءِ سر ءَ وتی گیشیں زورگیری ءَ برجاہ داشت نہ کنت، بلوچ وتی سرڈگار ءِ سر ءَ ساڑی انت ءُ دژمن ءَ ھر سنگر ءَ بے سوب کنت –

جارکش ءَ وتی درشان ءِ گڈسر ءَ گوشتگ کہ زورگیریں پوج ءِ سر ءَ مئے اُرش بلوچستان ءِ آجوئی ءَ تاں برجاہ مان انت –