کتاب: مھر گوش ءِ سر ءَ چمشانکے
نبشتہ کار: میرو مری
دی بلوچستان پوسٹ
کتاب مھر گوش بلوچ لبریشن آرمی ءِ سروک واجہ بشیر زیب بلوچ ءِ اولی کتاب انت اے کتابے نبشتانک مارچ 2016 تا مارچ 2017 ءِ سیاسی جھل ءُ برزیانی سر ءَ آئی ءِ نبشتانک انت اے کتاب ءِ درستی 176 تاک دیم انت کہ ایشی ءِ توک ءَ نبشتہ کار ءَ ھمے سیاسی جھل ءُ برزیانی ءَ نپسیات ءِ علم ءِ رد ءَ گیش ءُ گیوار کنگ ءِ جوانیں جھدے کتگ ءُ وتی ھیال ءُ لیکہ یک کتابے ءِ دروشم ءَ وتی راج ءِ دیم ءَ آؤرتگ انت اے کتاب ءِ اولی بھر مئے دست ءَ اتکگ ءُ ایشی ءِ دومی بھر گمان بیت کہ دیمتر ءَ بلوچ راج دیم ءَ کئیت انت-
کتاب ءِ اے اولی بھر ءَ جتا جتائیں سرھالانی سر ءَ نبشتہ کنگ بوتگ کہ من نوں چندیں نبشتانکانی سر ءَ وتی ھیال ءُ لیکھاں نبشتگ کنگ ءِ جھد ءَ کن آں –
اولی نبشتانک ” سنچ ءُ مکسد ءِ ” سر ءَ نبشتہ بوتگ اے نبشتانک ءِ توک ءَ آ گش ایت کہ سنچ پہ مکسد ءَ بیت ءُ پہ مکسد ءِ واستا یک مھکمیں سِنچے ءِ بوھگ ھژدری انت پد ءَ زانت ءُ سرپدی ءِ ھمے مکسد ءِ دیمروئی ءَ کنت ءُ پہ وتی منزل ءِ سر بوھگ ءِ ھاترا ترا یک تچکیں راھے گچین کنگی انت ءُ ھر وھد ءَ امل کنگی انت یکمشت ءُ یک سنچے ءِ ٹولی ءَ وتی منزل ءِ رسگ ءَ پہ یک جوانیں ءُ دور چاریں رھشونے ءِ سروکی الّمی انت- یک توانگریں ٹولی ءِ لوٹ ایت کہ آ وتی رھشون ءِ ھمراھداری ءَ بہ کن اَنت وھدیکہ یک رھشونے گوں وتی توانگریں ٹیم ءَ یک توانائیں ڈسپلن Displine ءِ گوں بندوک بیت گڑا منزل ءِ سر بوھگ ءَ ارزانی بیت ءُ تنگی کم بنت ءُ ھمے کل یک پارٹی ءِ گشگ بنت-
امیت ءُ بھیسہ ءِ سر ءَ وتی ھیالاں درشان چو اے وڑ ءَ کنت کہ، انسان ءِ اولی پدیانک چہ امیت ءَ بنا بیت ءُ پد ءَ آ دیم ءَ جنز ایت ءُ کار کنت آ وتی راجی جھد کار ءُ بلوچ مھلوک ءَ گش ایت کہ ھچ کس ءَ اے ھک Right ءَ مہ دے کہ آ ترا نا امیت بہ کنت ءُ ترا چہ تئی لوٹ ءُ کاز Cause ءَ دلپروش بہ کنت چیا کہ امیت ءِ ھلاسی انسان ءِ زند ءَ گوں بندوک انت وھدیکہ یک انسانے ءِ امیت ھلاس بہ بیت یا چرائی ءَ چہ پچگرگ بہ بیت تا انسان تھنا یک زندگیں جونے بیت ءُ مان ایت-
بلوچ جھد کارانی سپر یک نہ اوشتوکیں کاروانے، آئی ءِ اوشت تھنا گوں بلوچ زمین ءِ آجوئی ءَ بندوک انت اے دراجیں راہ ءَ ھر وڑیں تنگی ءُ نزوری دیم ءَ کاینت اے نزوری ءُ کوتاھی ءُ تنگیاں یک جھد کارے ھما وھد ءَ وتی ھکّ ءَ کنت کہ آ سرجم ءَ زھنی دروشم ءَ آزات بہ بیت ءُ زانت ءُ سرپدی ءَ مھکم بہ بیت-
اگاں دیم ءَ جیڑھے اتک گڑا ھمک کس ھمے جیڑہ ءِ سائنسی بنیاتاں چار ءُ تپاس ءِ جھد ءَ بہ کنت ءُ جیڑہ ءِ گیش ءُ گیواری ءَ بہ کنت نا کہ دلپروش بہ بیت- راجی جنز ءِ راہ ءَ دلپروشی ءِ ھچ جاہ نیست اِنت-
تُرس ءِ باروا واجہ وتی دُرّیں دانکاں نبشتہ کنت ءُ گش ایت کہ تُرس ءِ دگنیا ءِ تھاریانی آماچ انت ترس مدام انسان ءِ بودشت ءُ آئی ءِ مھکمیں پیسلھانی دیم ءَ کئیت ءُ اوشت ایت نپسیات ءِ زانت ءِ رِد ءَ ترس ءِ دو تھر انت اولی تھر وتی رکّینگ ءِ ترس انت ءُ دومی تھرے ترس لگوری انت ءُ باز براں رکینگ ءِ ترس وھدے وتی سیمسراں چہ درکپ ایت داں آ لگوری گشگ بیت ءُ لگور نہ پہ وت چیزے کت کنت ءُ نہ کہ وتی راج ءُ زمین ءِ ھاترا-
بلوچاں گوشتگ کہ یکّیں پتّر ءَ گوات بارت تو ھور ءِ یکمشت ءُ ھمسنّتے گڑا تو بدواھاں پروش دات کن ئے اگاں شنگتگے ءُ نا تپاکے تاں بدواہ ترا اّلم پروش دنت-
مولوی عبداللہ پیشنی ءَ گوشتگ کہ:
“اے بلوچاں اتھاد”
“پہ وشیں روچاں اتھاد”
گڈسراں نبشتہ کار (واجہ بشیر زیب) ءَ وتی راجی جھد کار ءُ بلوچ راج ءَ لوٹ کرتگ کہ آ چہ شھیدانی کھولاں بے ھیال مہ بنت، آوانی تؤکل جوڑ بہ بنت ءُ آھاں دلبڈی بہ دے اَنت-
پہ بلوچ ماتاں وتی کلوہ ءَ نبشتہ کنت ءُ گش ایت کہ اے منی مکھیں ماتاں تئی کنگریں بچّانی ھون ءِ بیر ءَ راجی سرمچار ھر روچ گوں بدواھاں گرگ ءَ انت ءُ جنگ کنگ ءَ انت. ما چہ شھیدیں بچّانی ھوناں ھچبر شمشکار نہ بہ ایں-
“جور بیت جور جوابی بدیں جورانی دپ ءَ”
اے چندیں نبشتانکانی سر ءَ منی ھیال ءُ تران ات انت البتہ! سرجمیں کتاب وانگ کرز ایت ھر بلوچ وانندہ اّلم اے کتاب ءَ بوان ایت-
بلوچ ءِ جنز توانگر بات شالا
بلوچستان آجو بات-
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔