چہ ھزدار ءَ آوار جنگ بوتگیں نودربر یل بوتگ انت

چہ ھزدار ءَ پاکستانی پوج ءِ دست ءَ زورانسری آوار جنگ بوتگیں دو ورنا یل بوتگ ءُ وتی گِس ءَ سربوتگ انت –

گیشیں ھالانی رِد ءَ گوستگیں سال ءِ گُڈی ءَ ھزدار ءِ دمگ گریشگ ءَ پاکستانی پوج ءَ دو ورنا سراج نور ءُ عارف بلوچ زورانسری آوار جتگ ءُ بیگواہ کتگ بوتگ انت –

پوج ءِ دست ءَ زورانسری آوار جنگ بوتگیں ھر دو نودربرانی کھولاں کراچی پریس کلب ءَ اھوالکارانی گوم ءَ تران کنان ءَ گوشتگ کہ عارف ء گاجیان جھمنند سریچ گریشگ ءُ سراج نور جھمنند اسپیکنری گریشگ وتی میتگ ءَ ھما وھد ءَ زورانسری آوار جتگ ءُ بیگواہ کتگ انت وھدیکہ آ نزیکیں میتگ پوگی ءَ سیادانی چارگ ءَ شُتگ واتر آیگ ءَ بوتگ انت –

کھول ءِ رِد ءَ آوار جنی ءَ پیش آھانی سر ءَ تیرگواری ھم کنگ بوتگ کہ چریشی ءَ آ پرپٹ ءَ کپتگ انت گڈا آوار جنگ ءُ بیگواہ کنگ بوتگ انت –

بلے مروچی ھردو ورنا یل بوتگ ءُ وتی گِس ءَ سر بوتگ انت – آھانی نزیکیں مردماں ھردو نودربرانی یل بوگ ءِ ھبر راست کتگ –

زانگ بہ بیت بلوچستان ءَ زورانسری آوار جنی ءَ دیر انت کہ یکشل ءَ برجاہ انت کہ آھانی تہ ءَ کمے مردم یل کنگ بوتگ انت، بیگواھیں مردمانی پانکجنیں گل وائس فار بلوچ مسنگ پرسنز ءِ رِد ءَ بلے دگہ دو ھمینچو آوار جنگ بوتگ انت –

گل ءِ رِد ءَ بلوچستان ءَ ھر تک ءُ پھناتاں سیادی داروکیں بیست ھزار مردم ءَ گیش مردم درکانودی آوار جنگ ءُ بیگواہ کنگ بوتگ انت کہ آھانی تہ ءَ گیشتریں کچ نودر ءُ سیاسی رھشونانی انت –