پنجگور: پولیس تھانہ ءِ سر ءَ اُرش، اُرش ءِ زمّہ واری بی ایل ایف ءَ منّ اِتگ

پولیس تھانہ ءِ سر ءَ دزبمب اُرش پولیس ءِ واستا بیھار ے بوتگ – میجر گوھرام

سربوتگیں ھالانی رِد ءَ ناشناسیں مردماں پنجگور ءَ پولیس تھانہ ءِ سر ءَ دز بمب اُرشے کُتگ –

اُرش مروچی بیگاہ ءَ پنجگور ءِ دمگ چتکان سٹی تھانہ ءِ سر ءَ کنگ بوتگ کہ ناشناسیں مردماں اتکگ ءُ دزبمبے چگل داتگ ءُ در شُتگ انت – دزبمب اُرش ءَ تھانہ ءِ گاڑیاں تاوان رس اتگ بلے ھچ وڑیں جانی تاوان نہ بوتگ اُرش ءِ زمّہ واری بلوچ آجوئی لوٹوکیں سلاہ بندیں گل بلوچستان لبریشن فرنٹ ءَ منّ اِتگ –

بی ایل ایف ءِ جارکش میجر گوھرام بلوچ ءِ رِد ءَ مئے سرمچاراں مروچی ادار ھپت ءُ نیم ءَ چتکان سٹی تھانہ ءِ سر ءَ دزبمب اُرش ءِ کُتگ –

میجر ءَ گوشتگ کہ اے اُرش پہ آھاں یک بیھارے بوتگ کہ سرمچارانی رندگیری ءُ زورگیریں پوج ءُ چیریں ادارھانی کمک کاری ءَ یل بہ کن انت ءُ وتگڑیں شوربندیانی ھمراہ داری ءَ دزکش بہ بنت – اگاں ناں ھما وڈ کہ پاکستانی پوج، چاریگ ءُ ریاستی کمک کارانی گون ءَ کنگ بیت ھما وڑ پولیس ءِ گون ءَ ھم کنگ بیت اِنت –